BAUCAU, 15 outubru 2021 ( TATOLI) – Invazaun ilegál hosi Repúblika Indonézia iha 7 dezembru 1975 hamate Timoroan liu rihun 250. Hosi númeru vítima mortál ne’e Ossouala oan sira hamutuk na’in-811 mak lakon vida durante funu naruk ida-ne’e.
Suku Ossouala kompostu hosi aldeia lima; Cai-denulale, Heine-uai, Lolinunu, Uai-khanasa, Uma-ana. Suku Ossouala ne’e perténsia ba postu administrativu Vemasse, munisípiu Baucau.
Suku Ossoula nu’udar knu’uk rezisténsia nian dezde 1975 to’o rezultadu referendu 30 agostu 1999, maibé hateke ba kotuk Timoroan hotu laran kanek no fitar ne’ebé sei haluha iha Repúblika Demokrárika Timor-Leste (RDTL) nia istória.
Nune’e VIII Governu Konstitusionál liuhosi Arkivu Muzeu Rezisténsia Timorense (AMRT) buka-tuir hodi halo prezersaun ba istória pasada sira. Oras ne’e AMRT iha hela Ossoala rekolla dadus rezisténsia nian.
Xefe suku Ossouala, postu administrativu Vemasse, munisípiu Baucau, Filipe Correia, fó-sai katak, totál vítima mortál iha funu laran hamutuk na’in-811 hosi uma-lisan hamutuk 93.
“Totál aldeia lima iha suku Ossouala ema ne’ebé mate durante funu hosi 1975 to’o 1999 hamutuk totál 811 kompostu hosi mane 461 no feto 350,” Xefi suku Ossouala informa ba Agência TATOLI, iha sede suku Ossouala, sesta ne’e.
Hosi númeru refere, aldeia Caidenulale hamutuk hamutuk na’in-155 kompostu hosi mane-sia no feto na’in-64. Hosi parte aldeia Hoineuai totál 166 kompostu mane 97 no feto 69, Lolinunu mane 77 no feto 71 hamutuk 148.
Hosi parte aldeia Uaikhanasa hamutuk na’in 184 kompostu hosi mane 105 no feto 79. Purtantu aldeia Uma-ana iku na’in-158 kompostu mane 91, feto 67.
Dadaun ne’e dadus refere sei iha autoridade suku Ossouala no hein atu submete ba postu admistrativu Vemasse molok entrega ba Sekretaria Estadu Kombatente no Libertasaun Nasionál (SEKLN).
Atividade refere bazea ba orientasaun hosi SEKLN ho objetivu atu hatene dadus loloos hosi totál vítima ne’ebé mate durante tinan 24 laran iha invazaun ilegál Indonézia nian.
Jornalista : Natalino Belo
Editor : Evaristo Soares Martins
