DILI, 13 fevereiru 2024 (TATOLI)—Governu liuhosi reuniaun Konsellu Ministru (KM) estraordinária, tersa ne’e, delibera hodi fó podér tomak ba Vise Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, reprezenta Timor-Leste asina protokolu adezaun Timor-Leste ba Organizasaun Mundiál Komérsiu (OMK).
“Asinatura ne’e prevee sei hala’o durante Konferénsia Ministeriál ba da-13 (KF13) OMK nian, ne’ebé sei hala’o iha loron 26 to’o 29 fevereiru 2024, iha Abu Dhabi (Emiradu Árabe Unidu),” refere nota ne’ebé Agênia Tatoli asesu hafoin reuniaun ezekutivu, iha Palásiu Governu.
Notísia relevante : 26 fevereiru, Timor-Leste asina pakote adezaun ba OMK iha Abu Dhabi
Governu hamutuk ho ekipa téknika, iha segunda (12/02), realiza reuniaun interministeriál hodi atualiza preparasaun sira molok delegasaun desloka ba Abu Dhabi.
Hafoin asina, Governu submete protokolu adezaun ba Parlamentu Nasionál hodi hetan ratifikasaun no iha períodu másimu to’o jullu tinan ne’e tenke submete konfirmasaun ba OMK tanba presiza loron-30 atu ekipa responsável rejista Timor-Leste ofisialmente sai membru plenu.
Timor-Leste nia esforsu adere ba OMK inisia iha loron 07 dezembru 2006, liuhosi kriasaun Grupu Traballu, nune’e hafoin tinan 14 Grupu Traballu prepara dokumentu nesesáriu sira hodi kumpre regra OMK.
Iha loron 01 outubru 2020, Timor-Leste realiza enkontru Grupu Traballu dahuluk ho nasaun membru OMK sira hodi diskute ho kle’an kona-ba seriedade aplikasaun sai membru planu.
Durante ne’e Timor-Leste hamutuk ho país 22 seluk sai observadór hodi akompaña prosesu no kumpre rekezitu hodi sai membru hanesan ho nasaun 164 sira seluk.
Hanesan país observadór, Grupu Traballu hanesan komité traballu hodi halo preparasaun, negosiasaun, prienxe rekezitu no tuir enkontru koordenasaun ho Estadu membru.
Adezaun ba organizasaun mundiál ne’e ho hanoin ida katak Governu bele halo parseria ho setór privadu nasionál no internasionál atu loke kampu traballu ba timor-oan.
OMK hanesan organizasaun ne’ebé regula komérsiu entre país sira ho objetivu atu garante katak atividade komersiál hotu la’o ho forma fasil, livre, previzível no posível.
Jornalista : Antónia Gusmão
Editora : Julia Chatarina
