OÉ-CUSSE, 15 marsu 2024 (TATOLI) – Ministra Solidariedade Sosiál no Inkluzaun (MSSI), Verónica das Dores, sesta ne’e enkontru ho Prezidente Autoridade Rejiaun Administrativa Espsiál Oé-Cusse Ambeno (RAEOA), Rogério Tiago Lobato, hodi koordena kona-bá servisu sosiál, futuru kooperasaun kona-bá moras lepra no pagamentu pensaun sosiál iha Oé-Cusse.
“Ami agradese tebes ba RAEOA tanba simu ami-nia konvite antes ne’e hato’o mai, ne’ebé ohin ami mai ho asuntu tolu, atu informa Prezidente Autoridade RAEOA,” Ministra Verónica das Dores, ba jornalista sira iha Ambeno.
Notísia relevante: MSSI sei halo lansamentu pagamentu ba pensaun sosiál iha RAEOA
Governante ne’e, konfirma, asuntu tolu ne’ebé aprezenta iha enkontru ne’e primeiru kona-bá estatutu pesoál servisu sosiál iha Oé-Cusse, daruak aprezenta ba Prezidente Autoridade kona-bá idozu, pagamentu pensaun sosiál, atu hala’o iha Oé-Cusse sei lansa iha loron 18 marsu semana oin.
Nune’e mós asuntu ikusliu, informa mós ba Prezidente Autoridade no Sekretáriu Rejionál sira kona-bá servisu misaun lepra ninian ba futuru kooperasaun entre RAEOA ho Governu Sentrál.
“Ida-ne’e maka objetivu, ohin mai hasoru Prezidente Autoridade RAEOA no iha rezultadu pozitivu ba asuntu tolu ne’e,” nia katak.
Nia esplika, kona-bá estatutu servisu sosiál Oé-Cusse, ne’ebé estabelese kedas iha 2002 servisu ne’e kontinua la’o, maibé depois iha mudansa balun, Governu Sentrál liuhosi MSSI hato’o karta ida ba Prezidente Autoridade, no aseita ho pedidu sira-ne’e, ba pesoál sira-ne’ebé servisu iha instituisaun sosiál Oé-Cusse nian.
“Tanba ita-nia funsionáriu sira, ne’ebé maka estabelese iha-ne’e, atu servisu tuir saida mak Autoridade hala’o iha-ne’e, nune’e bele la’o ba oin ho ligasaun forte liután,” nia hateten.
Entretantu, tuir dadus benefisiáriu pensaun sosiál iha Rejiaun Oé-Cusse hamutuk 7043, mai hosi sub-rejiaun haat hanesan; sub-rejiaun Pante Makasar hamutuk 3.312, komposta suku ulau (8), hanesan suku Lalisuk 280, Cunha 450, Bobokase 178, Naimeko 465, Taiboko 697, Lifau 257, Costa 745 no suku Nipani 150.
Iha sub-rejiaun Nítibe hamutuk 1.417 komposta hosi suku lima (5), hanesan suku Suni-Ufe 180, Bene-Ufe 255, Usitaco 349, Lela-Ufe 385 no suku Ban-Afi 248.
Iha sub-rejiaun Oésilo hamutuk 1.570, komposta hosi suku tolu (3) hanesan suku Bobometo 926, Usitasa’e 511 no suku Usitaqueno 133.
Nune’e mós iha sub-rejiaun Pássabe hamutuk 744, komposta hosi suku rua (2), hanesan suku Abani 585 no suku Malelat 159.
Notísia relevanate: MSSI sei realiza pagamentu pensaun sosiál faze dahuluk iha 18 marsu
Jornalista: Abílio Elo nini
Editór: Evaristo Soares Martins
