OÉ-CUSSE, 12 abríl 2024 (TATOLI) – Komunidade afetadu sira iha bairru Samoro, suku Costa, sub-rejiaun Pante Makasar, espera Autoridade Rejiaun Administrativa Espesiál Oé-Cusse Ambeno (RAEOA), lideradu Rogério Tiago Lobato, rezolve disputa rai iha rezidénsia Fulolo.
Notísia relevante: Autoridade RAEOA konsulta komunidade afetadu Nipani molok halo pagamentu
Romanos Elo, nu’udar komunidade afetadu iha Fulolo, sei relembra, antes ne’e Autoridade Sesante liuhosi Servisu Terra no Propriedade hala’o ona pagamentu plantasaun ba komunidade afetadu sira, maibé balun seidauk tanba presiza paga mós ba rai afetadu.
“Ha’u rasik lakohi, tanba estatutu rai ne’e sei disputa hela, ha’u lakohi selu tiha plantasaun, depois futuru mai dehan selu ona ho rai, ne’e mak ha’u lakohi tenke selu dala-ida, rai no plantasaun, ne’e mak iha espera autoridade agora ne’e bele rezolve ona,” Romanos Elo, ko’alia iha Samoro, segunda ne’e.
Nia konfirma, durante tinan barak, komunidade afetadu sira iha pertense Samoro no Masin sorin, koopera di’ak ho Autoridade, hodi konstrui obra rezidénsia Fulolo, no tinan barak ona hein, maibé seidauk iha solusaun.
“Durante ne’e, imi mós haree, ami la impede tanba rai iha ne’e dezenvolvimentu iha ona, halo uma Estadu, ita fakar ona osan barak iha-ne’ebá, sé Prezidente Autoridade ba hela iha-ne’ebá, ne’e ami la impede to’o tempu ruma hanoin netik ami, selu osan hira ami simu de’it mak ne’e de’it ona,” nia espera.
Notísia relevante: Autoridade RAEOA sei rekolla dadus afetadu ZEESM atu halo kompensasaun
Iha fatin seluk, Xefe suku Costa, Francisco Colo, informa, problema disputa rai ne’e akontese tinan barak ona iha suku Costa, tan ne’e nu’udar autoridade lokál esperansa ba Autoridade foun ne’e bele fó ona solusaun.
“Ha’u iha esperansa, katak ba futuru Autoridade foun presiza haree didi’ak problema ida-ne’e, atu hatuur didi’ak kuandu komunidade nia rai karik, Governu presiza rezolve ho dignu, tanba sira terus no triste tinan barak ona, ha’u lakohi autoridade agora ne’e mai aumenta tán problema, maibé povu hakarak fó ona solusaun ba sira-nia preokupasaun, tanba lakon rai no plantasaun,” nia husu.
Hatán ba asuntu ne’e, Sekretáriu Rejionál ba Asuntu Terra no Propriedade, Marcelino Marques Coro, sei forma ekipa tékniku, nune’e bele rekolla hika dadus afetadu sira, hafoin halo pagamentu.
“Ida-ne’e ita sei rezolve neineik tanba ami foin asumi kargu fulan rua, situsaumn sira-ne’e ita rona atua ho sein evidénsia, ita sei haree kondisaun sira-ne’e, kuandu iha ona evidénsia forte ita sei hakat tuir regra ne’ebé iha, tanba antes ne’e, ita rona rezidénsia ne’e atu fa’an, ne’ebé iha sei prepara ekipa ida atu rekolla fali dadus sira,” nia dehan.
Purtantu, liga ho asuntu rai no pagamentu nian, Agência Tatoli tenta konfirma ho Diretór Terra no Propriedade RAEOA, Celestino Casenube, maibé okupadu ho servisu seluk.
Iha 2023, komunidade afetadu ne’ebé pertense ba bairru Samoro no Masin hamutuk uma-kain 76, hato’o ejizénsia pontu 12 ba Governu Sentrál no Autoridade atu fó klarifikasaun, tanba dezde 2015 to’o 2023, seidauk hetan direitu indemnizasaun.
Notísia relevante: Abitante afetadu 76 iha Costa hato’o pontu 12 ba Governu Sentrál no Autoridade RAEOA
Jornalista: Abílio Elo Nini
Editór: Evaristo Soares Martins
