DILI, 12 Maiu 2024 (TATOLI) – Centro Nacional Chega! Institutu Públiku (CNC,I.P) prepara hela dadus sobrevivente vulneravel hamutuk 180-resin hodi submete ba Ministériu Solidaridade Sosiál no Inkluzaun (MSSI) atu halo pagamentu apoiu pontuál ne’ebé sei hala’o iha tinan oin.
Diretór Divizaun Solidaridade Sobrevivente iha CNC,I.P, Nelson Miranda Seixas, hateten programa CNC nian kona-ba pagamentu pontuál ne’e serbisu hamutuk ho MSSI, ne’ebé hatudu katak Governu la husik liman ba rekomendasaun Komisaun Akollimentu, Verdade no Rekonsiliasaun (CAVR, sigla portugés) kona-ba Estadu labele haluha ka husik leet vítima funu sira ne’e.
“Tinan ne’e, ita prepara tan ona dadus sobrevivente vulneravel hamutuk 180-resin, ne’ebé sei submete ba MSSI hodi hetan pagamentu apoiu pontuál iha tinan oin, tanba foin lalais Konsellu Ministru aprova ona dekretu-lei kona-ba kriasaun apoiu subsídiu pontuál ba vulneravel sira. Hein de’it promulgasaun husi Prezidente Repúblika,” Nelson Miranda Seixas informa ba Tatoli via telefone.
Nia hatutan, programa pagamentu pontuál ne’e CNC no MSSI halo kooperasaun iha 2018 no asina kedan nota entendimentu ida oinsá parte rua ne’e serbisu hamutuk atu haree vítima funu ne’ebé vulneravel, ne’ebé osan ne’e ministériu mak prevee no dadus fornese husi CNC.
Notisia relevante: Governu halo ona pagamentu pontuál ba sobrevivente 300 resin
Nune’e, iha 2020, MSSI tau rihun $80 hodi apoia ba vítima sira no, iha 2022, MSSI hetan xamada husu Tribunál Konta kona-ba apoiu pontuál ne’e tenke mai ho baze legál. “Entaun, iha tinan ne’e kedan, MSSI hamutuk ho CNC halo diskusaun oinsá kria dekretu-lei ida hodi asegura pagamentu ba vítima sira ne’e”, nia relata.
Maske dekretu-lei preparadu, maibé Governu anteriór la konsege lori bá Konsellu Ministru (KM), tanba bainhira submete ezbosu ne’e mandatu hotu no, iha 2023, iha Ezekutivu atuál nia tempu, Ministra Solidariedade, Verónica das Dores, aprezenta fali ba KM hodi hetan aprovasaun.
“Iha fulan marsu nia-laran [2024] KM aprova duni dekretu-lei pagamentu pontuál ba vítima vulneravel sira. Entaun ba tinan ne’e, MSSI la konsege prevee orsamentu apoiu pontuál no muda ba tinan oin. Ho ida ne’e, ita prepara kedas dadus agora, nune’e tinan oin hein de’it pagamentu tanba na’in ba osan ne’e mak MSSI”, Nelson realsa.
Rekorde katak, entre 2020 no 2022, dadus sobrevivente ne’ebé haruka ona ba MSSI no hetan ona pagamentu pontuál hamutuk 331.
Regra pagamentu apoiu pontuál ba sobrevivente sira ne’e kada vítima ida simu dala ida de’it ho montante $500. Husi osan sira ne’e, hafoin CNC,I.P halo monitorizasaun, vítima balun uza ba halo fila-liman, haree oan nia eskola no seluk tan.
Notosia relevante : Governu inisia subsídiu apoiu pontuál ba vulnerável sira
Jornalista :Arminda Fonsenca
Editora: Maria Auxiliadora
