iklan

NASIONÁL, HEADLINE, INKLUZAUN SOSIÁL

Governu inisia subsídiu apoiu pontuál ba vulnerável sira

Governu inisia subsídiu apoiu pontuál ba vulnerável sira

Primeiru-Ministru, Kay Rala Xanana Gusmão, prezide reuniaun Konsellu Ministru, iha Palásiu Governu, kuarta (03/04/2024). Imajen Tatoli/Francisco Sony

DILI, 03 abríl 2024 (TATOLI)Governu liuhusi reuniaun ordinária Konsellu Ministru (KM), kuarta ne’e, aprova projetu dekretu-lei, ne’ebé aprezenta husi Ministra Solidariedade Sosiál no Inkluzaun, Verónica das Dores, kona-ba kriasaun subsídiu apoiu pontuál ba vulnerável sira.

Ho aprovasaun diploma ida-ne’e, hakarak atu estabelese apoiu públiku ne’ebé Estadu fó ba indivíduu no agregadu familiár sira iha situasaun vulnerável tebes no apoiu sira ne’e la inklui iha programa protesaun sosiál seluk.

“Apoiu sira-ne’e ho objetivu atu asegura satisfasaun benefisiáriu sira kona-ba nesesidade bázika, hodi hamenus sira-nia terus no fó kondisaun ne’ebé di’ak liu ba dignidade umana durante prosesu reintegrasaun sosiál,” haktuir nota ne’ebé Agência Tatoli asesu, hafoin reuniaun ezekutivu, iha Palásiu Governu, kuarta ne’e.

Notísia relevante : Governu hamosu apoiu sosiál ba inan isin-rua no labarik

Inisiativa ida-ne’e objetivu atu fó mós servisu asisténsia sosiál ho meiu ne’ebé adekuadu atu garante atendimentu emerjénsia di’ak liu ba indivíduu no família vulnerável iha ámbitu programa inkluzaun no reinsersaun sosiál.

Apoiu sira-ne’e bele hanesan hahán no sasán ba nesesidade bázika ba uzu pesoál ka uzu doméstiku, apoiu osan, psikososiál ka funeráriu, nune’e mós transladasaun, reintegrasaun familiár ka internamentu.

Tipu apoiu públiku ne’ebé sei fó ho ninia montante depende ba avaliasaun situasaun vulnerável sosiál husi profisionál departamentu governamentál ne’ebé responsável ba asisténsia sosiál, ne’ebé sei konsidera, iha kazu benefisiáriu ne’ebé sei moris, iha relasaun entre rendimentu per-kapita familiár ne’ebé hanesan ka ki’ik liu iha liña pobreza no avaliasaun ba ezisténsia husi situasaun vulnerável tebes ne’ebé prevee iha diploma ne’e.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!