BOBONARO, 21 maiu 2024 (TATOLI)-Prezidente Autoridade Munisipál (PAM) Bobonaro, Alexandrino Pires, tersa ne’e selebra akordu ho funsionárių suku foun hamutuk na’in-200 ne’ebé sei koloka ba suku 50, postu administrativu neen.
PAM Bobonaro, Alexandrino Pires, hatene funsionariu suku foun sira mak sai liman-ain no sai forsa estadu nia ba dezenvolvimentu iha nível baze, tanba ne’e líder másimu iha autoridade munisipál Bobonaro ne’e.
Nia dehan, funsionariu foun sira presiza servisu maka’as, tanba iha futuru bainhira munisípiu Bobonaro tama ona podér lokál no desentralizasaun administrativu, kada suku sei hetan alokasaun orsamentu ho montante rihun $75.
Notisia relevante: Espasu sede suku la sufisiente atu akumula ofisiál foun na’in-haat
“Hahú ohin ita-boot sira sai servidór povu, imi na’in hirak-ne’e mak sai ujung tombak dezenvolvimentu iha suku laran, tenke hare servisu iha suku laran, tanba ita-boot sira asina kontratu atu apoia administrasaun xefe suku, labele ba xefe suku la’o ketak, imi la’o ketak, ita-boot sira tenke servisu kualkér oras,” nia hateten iha Jináziu Maliana.
“Ita boot sira halo kontratu ho estadu, signifika katak imi-nia tempu tomak oferese hotu ba estadu,” nia fó hanoin.
Diretora Finansa Autoridade Munisipál Bobonaro, Donata Marques, hateten, IX Governu rekruta funsionárių foun na’in haat atu apoia no mellora servisu administrasaun suku no redús dezempregu.
“Dezenvolvimentu suku servisu administrasaun suku iha ita-boot sira-nia liman, tanba ita-boot sira tenke hatudu atitude ne’ebé di’ak, servisu ho responsabilidade atu serbí povu iha suku laran,” nia akresenta.
Diretora ne’e hatutan, prosesu pagamentu insentivu ba funsionáriu suku na’in-haat ne’e, sei realiza fulan tolu dala-ida no tipu subsídiu iha oin tolu, kompostu husi subsídiu fiksu, operasionál no morte.
“Ita-boot sira tenke halo lai relatóriu mak foin simu subsídiu, agora daudaun ami konsidera ita-boot sira asina kontratu iha 01 juñu, signifika agostu mak ita-boot sira hetan subsídiu, tanba ninia lala’ok mak hanesan ne’e,” nia informa.
Iha fatin ketak, Diretora Servisu Munisipál Apoia Organizasaun Naun Governamentál no Organizasaun Komunitária Munisípiu Bobonaro, Engracia Soares, reforsa daudaun ne’e halo ona proposta ba nasionál atu apoia mobiliáriu, ekipamentu elektróniku ka komputadór tolu no mákina empresór rua.
Nia hatutan, foin lalais ne’e diresaun Apoia ONG no Organizasaun komunitária mós tau ona orsamentu iha planu Asaun Anuál 2025 atu aumenta tan espásu sede suku hodi fasilita funsionariu sira halo servisu.
Notisia relevante: Ministra Edukasaun husu Xefe Suku iha Maliana atu servisu ho povu
Jornalista: Sérgio da Cruz
Editór: Evaristo Soares Martins
