DILI, 02 jullu 2024 (TATOLI) – Prezidente Institutu Kualidade Timor-Leste (IQTL, sigla portugés), Rosito de Sousa Monteiro, informa ekipamentu ba kalibrasaun ba estabelesimentu laboratóriu nasionál iha ona dalan.
Prezidente ne’e dehan serbisu koordenasaun IQTL no Organizasaun Nasaun Unida ba Dezenvolvimentu Industriál (UNIDO, sigla inglés) realiza ona, iha semana kotuk, enkontru ida atu halo reabilitasaun faze daruak ba laboratóriu internál IQTL nian iha aldeia Boa Morena, suku Motael, postu administrativu Vera Cruz, munisípiu Dili.
“Ita-nia kooperasaun ho UNIDO atu estabelese laboratóriu nasionál ba teste kualidade produtu, daudaun UNIDO haruka ona ekipamentu laboratóriu ba kalibrasaun nian husi Viena, Áustria, mai Timor-Leste. Ita hein fulan ida ka rua sei to’o”, Rosito Monteiro dehan ba Tatoli, iha Timor Plaza, Dili, ohin.
Antes ekipamentu sira ne’e to’o país, ekipa IQTL halo esforsu atu reabilitasaun ba laboratóriu hodi kompleta, liuliu kona-ba ahi han karik tenke antesipa kedas fire protection system, tau ar kondisionadu no seluk tan. Ida ne’e rekomendasaun husi UNIDO tuir padraun internasionál.
Kestiona sobre sosa mákina item tolu ba halo teste ba kafé, bee no mina-nuu nian, dirijente ne’e responde katak daudaun ekipa téknika IQTL sira hahú halo preparasaun hodi aprezenta ba iha konkursu públiku.
“Antes atu sosa, tuir rekomendasaun husi UNIDO, tenke iha uluk laboratóriu, entaun agora foku ba reabilitasaun daruak edifísiu laboratóriu ninia no prosesu aprovizionamentu sei fó sai konkursu públiku. Tanba tinan kotuk ne’e halo uluk reabilitasaun ba edifísiu”, salienta.
“Mákina item tolu atu sosa ne’e, IQTL nia planu maibé kooperasaun ho UNIDO ne’e, sira mak apoiu ekipamentu ba kalibrasaun nian hodi halo instalasaun iha laboratóriu IQTL nian. Maibé, ba faze instalasaun ita sei hein reabilitasaun ba faze daruak nian ramata lai”, Rosito hateten.
Orsamentu ne’ebé prevee halo reabilitasaun faze dahuluk ba edifísiu laboratóriu IQTL iha tinan kotuk hamutuk rihun $89 no prevee ba reabilitasaun faze daruak ne’ebé sei lori ba konkursu públiku hamutuk rihun $84.
“Atu dehan de’it katak antes ramata tinan ne’e, ita iha ona laboratóriu nasionál ida. Ita estabelese tarde oituan tanba prosesu mak la’o kleur”, nia esplika.
Notisia relevante : https://tatoli.tl/2024/01/23/iqtl-i-p-lori-produtu-lokal-tolu-teste-iha-rai-liur-iha-tinan-2023/
Jornalista: Arminda Fonseca
Editora: Maria Auxiliadora
