OÉ-CUSSE, 16 jullu 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA prodús ona deliberasaun ida atu halo pagamentu ba rai afetadu husi projetu sira iha Oé-Cusse ho valór kada metru² $5.
“Ohin, Sekretáriu Rejionál sira hamutuk ho ha’u, ami halo deliberasaun ida, depois Sekretáriu Rejionál Terra Propriedade rona komunidade sira-ne’ebé lakon rai. Ohin, hothotu konkorda selu ho $5 kada metru kuadradu”, Prezidente RAEOA, Rogério Tiago Lobato, informa ba jornalista sira.
Dirijente RAEOA ne’e la esplika detalla kona-ba deliberasaun ne’ebé prodús ona, tanba parte autoridade entrega ona ba juridiku sira hodi públika iha Jornál Repúblika.
“Deliberasaun ne’e ita hasa’e husi $3 ba $5 kada metru kuadradu, tanba daudaun ne’e autoridade RAEOA aloka ona osan millaun $1 atu fó kompensasaun ba rai. Ne’e promesa ami halo bainhira simu pose. Agora, hein de’it deliberasaun ne’e sei públika iha Jornál Repúblika, depois ita sei marka loron hodi halo pagamentu, tanba ita halo deliberasaun ne’e atu anula deliberasaun sira antes ne’e selu ho $3”, adianta.
Notísia relevante: Abitante afetadu 76 iha Costa hato’o pontu 12 ba Governu Sentrál no Autoridade RAEOA
Sekretáriu Rejionál ba Asuntu Terra no Propriedade, Marcelino Marques Coro, fó sai katak ekipa téknika rekolla ona dadus abitante afetadu hamutuk 372 mak sei hetan indemnizasaun no deliberasaun vale ba sira-ne’ebé seidauk simu kompensasaun.
“Rai sira-ne’ebé atu selu ba abitante 372, komposta husi suku Cunha 111 no suku Costa 261. Ba suku Nípani ho Lalisuk selu ona iha autoridade anteriór, ita selu ba rai de’it tanba plantasaun sira antes ne’e selu ona”, dehan.
Nia esplika katak deliberasaun ne’e aplika ba de’it sira-ne’ebé seidauk simu indemnizasaun ba rai. “Lei ne’e aplika ba oin, la’ós ba kotuk. Ba sira-ne’ebé seidauk selu, bele hetan direitu ne’e, maibé kuandu simu ona entaun labele simu tan”, nia apela.
Notísia relevante: Autoridade publika mapeamentu suku haat prepara indemniza rai afetadu ZEESM
Rekorde katak, iha Marsu 2023, autoridade anteriór RAEOA lideradu husi Arsénio Paixão Bano aprova deliberasaun ida ho númeru 2/2023, loron 24 fulan-Fevereiru ho valór másima kada metru-kuadradu ho dolár $3.
Jornalista: Abílio Elo Nini
Editora: Maria Auxiliadora
