DILI, 19 agostu 2024 (TATOLI)-Deputadu membru komisaun B trata asuntu Negósiu Estranjeiru no Defeza ho Seguransa iha Parlamentu Nasionál (PN), Natalino dos Santos, husu ba autoridade kompetente atu kontrola sirkulasaun tabaku ilísitu iha rai-laran.
Notísia Relevante: Proposta PLP-KHUNTO hatun taxa tabaku pasa iha PN
“Tanbasá sigaru ka tabaku ilegál barak bele mai faan to’o iha ne’e, fila-fali ba ita-nia autoridade sira-ne’ebé kompetente haree kona-ba ida ne’e. Ida-ne’e, liuliu sira iha fronteira Autoridade Aduaneiru ka ALFANDEGA ne’ebé kontrola sasán tama no sai no sira-ne’ebé tama ilegál Unidade Polísia Fronteira (UPF) atu haree. Se lae, fó impaktu ba ita-nia ema sira-ne’ebé iha lisensa atu faan sigaru legál, maibé ho ilegál ne’ebé mai iha fó impaktu ba sira,” nia hateten ba Agência TATOLI iha resintu Parlamentu Nasionál, segunda ne’e.
Autoridade relevante tenke no presiza buka hatene sigaru ilegál ne’e mai husi ne’ebé, nune’e husu PNTL liuhusi unidade UPF atu hametin kontrola iha liña fronteira.
Tanba ne’e, nia husu Ministériu Interiór no komandu PNTL atu kria kondisaun ba Unidade Polísia Marítima (UPM) atu iha kondisaun ró hodi halo patrolla iha tasi iha área Suai,Oé-Cusse, Atabae, tanba kondisaun UPM nian laiha ró atu halo patrolla iha tasi, nune’e bele fó fatin ba atividade ilegál hatama sasán liuhusi marítima.
“Kondisaun ne’ebé ita ladún iha bele fó impaktu ba sasán ilegál ne’ebé tama,” nia dehan.
Nia mós husu Autoridade Inspesaun Fiskalizasaun Ekonomia no Sanitária, Institutu Públiku ((AIFAESA, I.P) atu tau atensaun ba negosiante sira iha merkadu no fatin públiku sira-ne’ebé agora faan hela sigaru ilegál.
Tanba ne’e, presiza kontrola sirkulasaun sigaru ilegál tanba tuir parte saúde fó sai katak sigaru ne’ebé laiha estandarizasaun mak sirkula livre bainhira fuma bele hetan impaktu ba saúde, inklui sirkulasaun ne’e hamate empreza sira-ne’ebé hatama sigaru legál no la selu taxa ba Estadu.
Antes ne’e mós Deputadu CNRT, Duarte Nunes, husu ba autoridade kompetente atu kontrola másimu sikulasaun sigaru ilegál, tanba ne’e la kontribui reseita ba Estadu.
Jornalista : Nelson de Sousa
Editór : Cancio Ximenes
