DILI, 28 Agostu 2024 (TATOLI) – Sekretáriu Estadu Peska, Domingos dos Santos, preokupa ho atividade peska ilegál iha tasi Timór, tanba kontinua sai problema ba nasaun.
Governante ne’e dehan maske peska ilegál hahú redús ona iha tasi Timór iha 2023 no 2024, kompara ho tinan 2021 bá kotuk, maibé atu kombate atividade ida ne’e kontinua sai obstákulu, tanba Autoridade Nasionál Maritima ne’ebé Governu kria seidauk iha ekipamentu adekuadu atu halo kontrolu di’ak ba movimentasaun ró husi nasaun seluk mai iha tasi Timór.
“Asuntu peska ilegál sai nafatin problema boot ida iha nasaun ne’e, mezmu Timor-Leste sai ona nasaun ida livre no independente”, sekretáriu Estadu dehan ba Tatoli, iha Comoro.
Nia dehan Autoridade Marítima enfrenta hela limitasaun ba ekipamentu hanesan ró atu reforsa serbisu hodi hala’o kontrolu kada loron iha tasi. Maibé, ho limitasaun sira ne’e, la sai barreira ida atu impede serbisu autoridade nian.
“Sira kontinua serbisu ho responsabilidade hodi redús númeru peska ilegál ne’ebé tama iha soberania tasi Timór”, salienta.
Liuhusi estabelesimentu Autoridade Maritima hatudu ona rezultadu di’ak bainhira kompara ho tinan 2019-2021, Timor-Leste lakon rekursu tasi kuaze tonelada 1.300 kada tinan. Maibé, hahú iha 2023, país konsege redús ona movimentu peska ilegál, nune’e ikan ne’ebé lakon tun ba tonelada 1.020, ne’ebé konverte ba osan hamutuk millaun $22.
Tanba ne’e, ba 2025, Sekretaria Estadu Peska kontinua halo esforsu atu apoia Autoridade Marítima ne’e ho ekipamentu adekuadu hodi bele hala’o sira-nia serbisu ho di’ak atu sátan atividade ilegál ne’ebé halo iha tasi Timór.
Domingos dos Santos husu ba peskadór timoroan sira bainhira hasoru ema deskoñesidu husi nasaun seluk maka tama soberania tasi Timór tenke informa lalais ba Autoridade Marítima, nune’e bele hapara atividade ne’e.
“Ita mós halo ona sensibilizasaun ba komunidade ne’ebé hala’o atividade peska bainhira hetan ró ruma ne’ebé la koñese ho bandeira la loos, bele informa lalais ba autoridade atu halo intervensaun”, dehan.
Atu asegura área tasi Timór ne’ebé luan, tenke iha ekipamentu sufisiente hodi bele halo kontrolu ba zona sira ne’e. “Instalasaun Autoridade Marítima konsege halo kontrolu ho másimu, liuhusi kooperasaun serbisu ho autoridade marítima sira husi nasaun viziña atu sátan atividade peska ilegál”, realsa.
Notísia relevante: Timor-Leste lakon millaun $22 tanba peska ilegál
Jornalista: Tomé Amado
Editora: Maria Auxiliadora
