DILI 06 setembru 2024 (TATOLI)–Ministériu Edukasaun (ME) hahú ona halo imprensaun ba pontu ezame nasionál.
“Ita hahú ona ho preparasaun ba pontu ezame nasionál no elaborasaun ezame nasionál depois validasaun pontu ezame nasionál, no ida-ne’e ita halo hotu ona. Agora tama ba imprensaun ezame nasionál. Ohin ita hahú to’o iha 11 outubru,” Koordenadór Gabinete Unidade Kurríkulu Nasionál iha ME, João Maupelu, informa ba Agência tatoli, iha ninia knaar fatin, Vila-Verde, sesta ne’e.
Hafoin imprensaun kontinua halo pakotementu, nune’e entrega pontu ezame nasionál ba kada eskola iha loron 11 to’o 12 outubru 2024.
Notísia relevante : Posibilidade ME koloka kandidatu admitidu faze daruak ba ESTV hodi prepara ezame nasionál
Matéria ezame nasionál ba ensinu báziku mak hanesan matemátika, inglés, portugés, istória no jeografia no Siénsia naturál inklui tetun. Ba Sekundáriu Jerál mak matemátika, ekonomia kuantitativu, inglés, portugés, kímika, istória, biolojia, sosiolojia, fízika, jeografia no tetun. Ba ensinu sekundáriu tékniku vokasionál hanesan matemátika, ekonomia kuantitativu, portugés, fízika kímika, fíziku de’it mós iha, ekonomia, kímika, sosiolojia, jeografia e sosiolojia, depois istória no biolojia.
“Ami simu dadus depois ezame primeiru períodu hamutuk 58.271, ensinu báziku 29.252, ensinu sekundáriu jerál 24.894, ensinu sekundáriu tékniku vokasionál 4.125,” nia akresenta.
Koordenadór Kurríkulu hateten, ida-ne’e hanesan lista provizória de’it, karik iha mudansa sei halo aumenta imprensaun pontu ezame nasionál.
Jornalista : Osória Marques
Editora : Julia Chatarina
