OÉ-CUSSE, 27 Setembru 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) kanaliza bee ba natar ektare 12,61 iha área Petun, suku Cunha, sub-rejiaun Pante Makasar, tanba daudaun ne’e bee komesa menus ona.
Asesór ba Asuntu Sosiál, Agustinho Caet, informa kanalizasaun bee ne’e halo hafoin irrigasaun Tono maran no fó impaktu ba natar ektare 12,61 iha área Petun. Tanba ne’e, nia parte serbisu hamutuk ho Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, I.P) halo intervensaun hodi kee bee iha irrigasaun Tono hodi fornese ba natar sira.
Notísia relevante: Xanana Gusmão tulun agrikultór fornese bee ba natar Petun
“Foin daudaun agrikultór sira mai hato’o sira-nia proposta. Agora mak ita responde hodi mai iha ne’e, tanba enfrenta falta bee ba natar sira iha área Petun, ne’ebé halai ba dala-rua nian. Dahuluk, sira kolleta ho susesu, maibé iha faze daruak ne’e mak enfrenta problema bee ne’e mak ita apoia atu salva hare sira-ne’e atu kolleta”, Agustinho Caet hahaten iha suku Cunha, ohin.
Kanalizasaun bee ne’e hetan apoiu husi autoridade ne’ebé fornese mákina supa bee no dada ho poli pipe no agrikultór sira mós ajuda no espera katak haree sira ne’ebé kuda ne’e sei fó rezultadu di’ak.
Notísia relevante: Rezultadu kolleta natar Petun Oé-Cusse menus
Iha biban ne’e, agrikultór Marcel Biren informa katak natar iha área Petun kada tinan halai dalarua, tanba débitu bee iha irrigasaun Tono sufisiente, maibé tinan ne’e la konsege fornese ba natar sira.
“Baibain halai dala-rua iha tinan ida, tanba iha fulan-Abríl foin lalais ne’e kolleta ho susesu no ami haree bee iha irrigasaun sufisiente ne’e mak halai tan dala-ida, maibé tama Setembru ne’e bee komesa maran fali ona, entaun ami buka apoiu. Agradese, ohin, hetan ona tulun, ne’ebé kuandu bee estavel, iha Outubru, ami bele kolleta ona tanba kuda hare iha Jullu ne’e”, nia espera.
Jeca Carvalho nu’udar jestór bee ba natar iha área Petun hateten natar ektare 43 envolve agrikultór na’in-175, maibé sira-ne’ebé halai tan natar ba-daruak ne’e iha ektare 12,61 iha na’in-43 de’it.
“Entaun, ami hamutuk buka meiu oinsá atu salva hare sira-ne’e, tanba falta bee halo natar sira maran. Ami sente ladi’ak mak husu apoiu ba autoridade no responde ami hodi lori tratór hodi ke’e bee no husu mákina atu supa bee hodi bele kanaliza tama ba natar sira. Ne’e mak susesu, ami sente kontente tanba autoridade mós la taka matan mai ami”, nia hateten.
Notísia relevante: Barajen Tono benefísia natar ektare 1.717 iha Pante Makasar
Jornalista: Abílio Elo Nini
Editora: Maria Auxiliadora
