DILI, 29 outubru 2024 (TATOLI)–Ministra Edukasaun, Dulce de Jesus Soares, husu ba profesór sira atu halo knaar di’ak atu eduka povu, nune’e bele garante mudansa dezenvolvimentu ba nasaun Timor-Leste.
“Hakarak fó parabéns ba profesór sira hotu, nune’e mós sira-nia família ne’ebé mak durante ne’e apoia sira atu sai profesór ne’ebé mak di’ak. Ministériu Edukasaun husu no motiva nafatin sira atu kontinua hala’o sira-nia knaar hanesan profesór ne’ebé di’ak atu eduka povu timor nia oan. Hala’o knaar ho di’ak liután tanba to’o loron ikus garante futuru ita halo mudansa iha nasaun ida-ne’e so profesór sira mak bele halo liuhusi edukasaun ne’ebé mak ita fó ba ita-nia oan sira, ita bele hetan sidadaun ne’ebé mak di’ak ho kualidade di’ak kuandu profesór asume knaar ho di’ak,” Ministra Dulce, hateten hafoin selebra loron mundiál profesór iha Institutu Nasionál Formasaun Dosente no Professionál Edukasaun (INFORDEPE), Balide, tersa ne’e.
Nune’e, husu mós ba inan-aman hamutuk ho líder komunitáriu sira iha suku, postu administrativu, munisípiu no nível nasionál atu kontinua fó apoiu ba profesór sira nune’e sira bele hala’o sira-nia knaar di’ak liután.
“Loron mundiál ne’e ba profesór sira hotu ne’ebé mak dedika sira nia-an no sira-nia vida durante ne’e hodi eduka povu timor niaoan sira iha área remota, área estremaremota, no muita remota nune’e mós iha fatin kapitál sira hotu. Profesór sira ne’e sira sakrifika sira-nia moris atu eduka ema seluk nia oan maibé ita bele haree katak profesór kuaze rihun 15 no agora kuaze sa’e ba rihun 17 ona. Sira hotu-hotu hala’o sira-nia knaar ho di’ak tebes, maski sira enfrenta dezafiu oin-oin, balun tenke la’o mai oras 5 mak to’o iha sir- nia eskola, balun tenke hanorin estudante sira ne’ebé mak iha saladeaula ida estudante barak tebes, balun mós iha fatin ne’ebé mak iha sira-nia edifísiu seidauk iha, maibé sira kontinua hala’o sira-nia knaar hanesan profesór,” nia akresenta.
Notísia relevante : Kolokasaun profesór admitidu bolsa kandidatu hein despaisu ministeriál
Tanba ne’e, Governu kontinua tau atensaun atu hadi’a profesór sira-nia vida no bem estar, nune’e mós kontinua fasilidade ba eskola sira atu nune’e prosesu aprendizajen atu eduka povu timor nia oan bele la’o di’ak liután to’o ikus bele hetan edukasaun ne’ebé mak kualidade hanesan mós rai seluk.
Iha biban hanesan, Prezidente INFORDEPE, Domingos Martins, konsidera komemorasaun loron mundiál ne’e hodi dignifika profesór sira-nia serbisu durante ne’e.
“Profesór sira mak sai eroi ida ba konstrusaun hanesan mós hola parte hanesan eroi ida ba konstrusaun nasaun, liu-liu ba ita-nia rai doben Timor-Leste tanba sein profesór ita labele halo buat ida. Nune’e, ohin ita selebra ida-ne’e hanesan aktu konfiansa ba profesór sira, ne’ebé Ministériu Edukasaun nian ba profesór sira tanba ho profesór mak ita bele dezenvolve di’ak liu tan sistema edukativu iha Timor-Leste,” nia katak.
Prezidente institutu dehan, iha era globalizasaun ida-ne’e hakarak ka lakohi manorin ida tenke adapta ona teknolojia.
“Hakarak atualiza situasaun modernu bele uza projetór, telfone iha matéria balun ne’ebé mak tau tiha ona internet oinsá mak halo peskiza ida relasiona ho matéria ne’ebé mak ami-nia atu hanorin ne’e. Ida-ne’e manorin sira tenke adapta,” nia katak.
Reprezentante Profesór, Filomena dos Santos, hateten, liuhusi loron mundiál profesór nia ida-ne’e husu ba Governu liuhusi Ministériu Edukasaun atu haree eskola sira ne’ebé iha área remotas sei menus fasilidade.
“Iha área remota sira fasilidade sei menus, ne’ebé ami husu ba Governu liuhusi Ministériu Edukasaun atu oinsá mak bele haree kada eskola, nune’e ami-nia estudante sira mós bele kompete iha atividade edukasaun,” Profesór dehan.
Jornalista : Osória Marques
Editora : Julia Chatarina
