OÉ-CUSSE, 19 Novembru 2024 (TATOLI) – Prezidente Konsellu Imprensa (KI) Timor-Leste, Otélio Ote, no Komandante Polísia Nasionál Timor-Leste (PNTL) Rejiaun Administrativa Espesiál Oé-Cusse Ambeno (RAEOA), Superintendente Polísia Nicolau Francelino da Costa, husu jornalista sira destakadu iha Oé-Cusse atu kontribui informasaun ne’ebé eduka sosiedade no kredivel.
Rekomendasaun sira-ne’e hato’o iha ámbitu enkontru entre Prezidente Konsellu Imprensa no Komandante PNTL Oé-Cusse, iha kuartél PNTL, ohin.
Otélio Ote salienta katak mídia mak disemina informasaun ba públiku atu hatene saida mak progresu no dezafiu sira, nune’e mak bele loke komunikasaun di’ak entre autoridade sira no povu.
“Tanba ne’e, jornalista destakadu sira iha Oé-Cusse kontinua hatudu performa di’ak iha futuru, tanba Oé-Cusse nu’udar rai enklave, bele iha kapasidade rasik atu jere territóriu ne’e no bele aprende husi rejiaun sira husi nasaun viziña. Agora, depende de’it husi kontribuisaun mídia sira atu sensibiliza sidadaun sira atu entende prosesu dezenvolvimentu hotu”, Otélio Ote dehan.
Tuir prezidente, jornalista sira nu’udar autór ba ponte informasaun, nu’udar mós matan, tilun, ibun ba komunidade, tanba ne’e tenke publika informasaun ho kredivel.
Iha enkontru ho autoridade seguransa sira, Konsellu Imprensa atualiza kona-ba ezisténsia KI no nia kompeténsia sira, oinsá hametin relasaun institusionál, liberdade imprensa no direitu resposta no retifikasaun.
Aléinde ne’e mós ko’alia kona-ba kondisaun loloos liberdade imprensa iha Oé-Cusse no oinsá atu haree ba futuru hodi asegura di’ak liután liberdade imprensa iha sosiedade sira no povu Oé-Cusse.
Notísia relevante: KI diskute asuntu haat ho jornalista destakadu sira iha RAEOA
“Ohin ami hetan esplikasaun husi komandu PNTL katak durante ne’e kooperasaun entre mídia sira di’ak tebes. Komandu agora koko atu dezenvolve komunikasaun di’ak liután ba atividade saida de’it mak PNTL halo, mídia mak tenke iha liña frente. Ida-ne’e hatudu parte seguransa entende knaar no kompeténsia mídia sira”, nia afirma.
Iha fatin hanesan, Komandante PNTL Oé-Cusse, Superintendente Polísia Nicolau Francelino da Costa, dehan prezensa mídia iha Oé-Cusse importante, tanba liuhusi órgaun komunikasaun ne’e mak bele kobre no hato’o informasaun ba públiku.
“Tanba ne’e, mídia nia papél importante mak tenke hasai informasaun korretu, justu no transparente. Ida-ne’e mak ami-nia esperansa ba oin katak presiza kaer metin ida-ne’e”, nia apela.
Notísia relevante: Otélio Ote kompromete hametin kooperasaun-promove liberdade imprensa no espresaun
Nia realsa katak iha enkontru ne’e ko’alia pontu prinsipál mak kooperasaun entre komandu PNTL no mídia mak tenke kontinua ba oin, tanba ezemplu de’it atividade sira durante ne’e hala’o iha Oé-Cusse tantu área urbana komu rurál jornalista sira sempre akompaña.
“Ida-ne’e hatudu ona katak ita-nia kooperasaun ne’e di’ak tebes, tanba realidade jornalista sira mai kobertura iha komandu ba kualkér atividade saida de’it. Importante mak publika informasaun ho loloos atu eduka ita-nia públiku sira”, nia hateten.
Notísia relevante: CI atribui karteira profisionál ba jornalista na’in-hitu iha RAEOA
Jornalista destakadu iha rai-ketan Oé-Cusse Ambeno mak husi Ajénsia Notisioza Tatoli, I.P, RTTL, E.P, Rádiu Komunidade Atoni Lifau (RCAL) no jornalista estajiáriu sira husi mídia One Timor.
Jornalista: Abílio Elo Nini
Editora: Maria Auxiliadora
