OÉ-CUSSE, 23 Novembru 2024 (TATOLI) – Primeiru-Ministru, Xanana Gusmão, halo abertura ba feira produtu lokál, ne’ebé realiza iha monumentu Lifau, iha Rejiaun Administrativa Espesiál Oé-Cusse Ambeno (RAEOA), hodi komemora Loron Proklamasaun Independénsia ba da-49, iha 28 Novembru.
“Agora ita hamutuk iha Oé-Cusse Ambeno, ha’u sente katak husi Tutuala to’o fronteira, husi tasi feto to’o tasi mane hothotu sei akompaña imi-nia atividade ne’e. Tanba ne’e, husu ba joven sira hadomi malu, husu ba katuas sira fó liman ba malu, husu ba lia-na’in sira hakotu tiha ema balun nia vontade atu soran ita”, Xanana Gusmão apela iha abertura espozisaun ne’e.
Notísia relevante: Palku ba komemorasaun 28 Novembru iha Oé-Cusse atinje 75%
Iha biban ne’e, Xefe Governu informa ba komunidade kona-ba tema ba komemorasaun 28 Novembru iha tinan ne’e mak “Orgullu ba ita-nia identidade no kultura, ita harii futuru liberdade, justisa no esperansa ba ita-nia povu”.
“Ida-ne’e loos, identidade no kultura ida-ne’e mak ita-nia hun no ita-nia abut. Dalaruma joven sira bá ona eskola kaer telefone halimar buat oioin no haluha tiha ita-nia kultura. Ema seluk mai bosok ita-nia tilun, ita fahe malu no estraga malu fali, ida-ne’e labele akontese iha Oé-Cusse”, nia fó hanoin.
Xefe Ezekutivu ne’e espera katak husi feira to’o komemorasaun Loron Proklamasaun ne’ebé hala’o iha Oé-Cusse sei hatudu imajen furak ba mundu.
“Parabéns, ha’u husu mós katak iha loron hirak-ne’e, Oé-Cusse sei hatudu la’ós de’it ba Timor-Leste tomak, maibé mós ba mundu, katak Timór rai ida-ne’ebé hamosu esperansa, hamoris sentidu fraternidade umana, tanba bei-ala sira no katuas-ferik sira-ne’ebé mate iha funu la husu buat ida, maibé fó hanoin nafatin ba ita liuhusi sira-nia mehi”, dehan.
Nia hatutan katak sira-nia mehi la’ós de’it atu hetan bandeira, la’ós de’it atu hetan inu nasionál ida, maibé sira-nia mehi ukun-aan tiha povu bele sente daudaun moris di’ak. “2025 ita hotu sei haka’as-aan ba serví povu no rai ida-ne’e”, nia promete.
Notísia relevante: RAEOA aloka rihun $200 ba komemorasaun Loron Proklamasaun Independénsia
Iha fatin hanesan, Mininstru Administrasaun Estatál (MAE), Tomás do Rosário Cabral, hanesan Prezidente Komisaun Organizadora garante katak eventu ne’e sei la’o ho susesu, tanba organiza husi komisaun nasionál no komisaun lokál husi RAEOA.
Nia adianta katak iha loron rua bá kotuk, atividade rua mak konsege hala’o ona mak hanesan atrasaun motorizada no karreta, no daudaun abertura feira ne’ebé organiza husi Ministériu Komérsiu no Indústria (MKI).
“Ohin ita mesak halo abertura feira ne’e, aban ba oin ita-nia maluk sira husi sorin NTT sei hamtuk ho ita. Sira-nia stand prepara ona, tanba sira sei mai aban no bainrua atu prienxe fatin sira-ne’ebé komisaun prepara ona”, nia dehan.
Tomás Cabral realsa katak orsamentu ba eventu 28 Novembru 2024 RAEOA aloka rihun $200 no verba husi Ministériu Administrasaun Estatál barakliu ne’e halo mobilizasaun ba ekipamentu ho sasán seluk ne’ebé hamutuk rihun $300, tanba sasán hotu mai husi Dili no selu ró mós karun.
Notísia relevante: PNTL Oé-Cusse preparadu asegura komemorasaun 28 Novembru
Partisipante ba feira nasionál ne’e mai husi populasaun suku 18 iha Oé-Cusse, ne’ebé mai ho idak-idak nia produtu lokál hodi demonstra, mai husi grupu kriativu sira mak hanesan halo produsaun tais, artezanatu, indústria mikro no pekena no produtu seluk tan.
Feira ne’e hala’o durante loron neen, hahú iha sábadu, loron 23, no sei enserra iha 28 Novembru kalan.
Jornalista: Abílio Elo Nini
Editora: Maria Auxiliadora
