DILI, 21 janeiru 2025 (TATOLI)—Tribunál Judisiál Primeira Instánsia Dili (TJPID), tersa ne’e, halo julgamentu ba kazu krime arma branka ne’ebé envolve husi arguidu MM.
Tuir akuzasaun husi Ministériu Públiku katak kazu ne’e akontese iha Taibessi, suku Lahane Orientál, iha loron 28 outubru 2019, tuku 5:00 madrugada Otl, iha serimónia hadeer aifunan loron 40, iha lezadu Domingos nia rezidénsia, Taibessi. Nune’e, bainhira lezadu Domingos ho nia maluk sira ko’a hela na’an, derepente arguidu AA ho nia grupu falun metin oin tama bá lezadu Domingos nia rezidénsia hodi hana Domingos ho nia alin Arnol.
Ho hahalok arguidu nian ne’e, halo lezada na’in rua rezulta kanek nune’e Ministériu Públiku akuza arguidu MM ho krime arma branka.
Iha sala julgamentu, arguidu MM deklara rejeita totál akuzasaun ne’ebé Ministériu Públiku akuza ba nia, tanba momentu ne’ebá nia tuir hela serimónia festa ida iha nia bairru Tuba-Rai, Taibessi.
Notísia relevante: Lei Arma Branka Sei Solusiona Problema Arte Marsiál
“Akuzasaun ne’e laloos tanba momentu ne’ebá ha’u tuir hela festa iha ami-nia bairru Tuba-Rai. Tan ne’e, akuzasaun ne’ebé dehan ha’u mak hana sira-ne’e laloos. La’ós ha’u,” arguidu deklara iha sala julgamentu Tribunál Judisiál Primeira Instánsia Dili, Caicoli.
Arguidu mós konfensa bá Tribunál katak durante iha nia moris nia laiha problema ho lezadu Domingos no Arnol nia família.
“Ha’u laiha problema ho señor Domingos no Arnol nia família. Sira mak dún no deskonfia de’it ha’u katak ha’u mak halo asaun iha momentu ne’ebá, maibé ha’u jura katak ha’u la halo ida-ne’e,” nia afirma.
Arguidu deklara katak nia hanesan membru husi organizasaun arte rituál 77 maibé durante ne’e nia laiha problema ho lezadu Domingos no lezadu Arnol nia família, maibé tanba de’it ninia envolvimentu iha arte rituál 77 mak lezadu sira deskonfia katak nia mak halo asaun hodi hana sira.
Hafoin rona tiha deklarasaun hosi arguidu MM, Tribunál deside marka filafali julgamentu bá loron 31 janeiru 2025, tuku 16:00 Otl, hodi kontinua rona deklarasaun lezadu Domingos no Arnol nian.
Audiénsia julgamentu ne’e prezide hosi juíz singulár José Maria, Ministériu Públiku reprezenta hosi prokuradora Ivónia Guterres, arguidu MM hetan asisténsia legál husi defensór públiku.
Iha fevereiru 2017 besik Eleisaun ba Prezidente Repúblika, hahú diskute kona-ba Lei Kriminalizasaun Arte Marsiál, Rituál, Arma Branka no Rama Ambon. Durante períodu sira-ne’e, Governu no Parlamentu Nasionál hahú konsulta ho entidade públika no sosiedade sivíl sira. Nune’e, Parlamentu Nasionál aprova iha loron 6 marsu 2017 no Prezidente Repúblika promulga iha 12 abríl 2017, Lei Nú. 5/2017 de 19 de abríl Regime Jurídico Relativo à Prática de Arte Marciais, Rituais, Armas Brancas, Rama Ambon e Quinta Alteração ao Código Penal.
Lei ne’e nia objetivu atu hatán ba situasaun Timor-Leste ligadu ba arte marsiál sira ne’ebé halo problema hodi utiliza arma branka no rama ambon. Antes ne’e, utiliza de’it rezolusaun no la forte atu kriminaliza arte marsiál.
Jornalista: Natalino Costa
Editór: Xisto Freitas da Piedade
