DILI, 11 Fevereiru 2025 (TATOLI)-Servisu Edukasaun Munisípiu Dili hahú implementa programa merenda eskolár iha Ensinu Báziku Sentrál (EBS, sigla portugés) iha pontu administrativu Metinaru.
“Ita halo ona abertura iha Ensinu Báziku Sentrál Metinaru iha fulan-ne’e, ida-ne’e signifika merenda eskolár hahú la’o”, Diretór Servisu Edukasaun Munisípiu Dili, Sabino da Costa Pereira, ba jornalista sira iha INFORDEPE, Balide, tersa ne’e.
Nia dehan eskola ne’ebé asesu ba merenda eskolár ne’e iha Dili hamutuk 138, Ekipa Jestaun Programa (EJP) ba merenda eskolár ne’e hamutuk 24.
“Totál alunu ne’ebé asesu ba merenda eskolár hamutuk 64.040 ho nia totál orsamentu alokadu hamutuk $5.137.288,80”, nia dehan.
Notísia relevante: Estudante 29.876 sai benefisiáriu ba programa merenda eskolár
Loron efetivu implementa merenda eskolár ne’e hamutuk 191. Kona-ba menu ba merenda eskolár, nia dehan nafatin maibé ida-ne’e EJP sira mak prepara tanba totál osan referida ne’e inklui ona ho pagamentu ba Grupu EJP sira.
Jornalista : Osória Marques
Editora : Rita Almeida
