DILI, 20 fevereiru 2025 (TATOLI) – Veteranu no hanesan mós atuál Deputadu bankada Governu husi Kongresu Nasionál Rekonstrusaun Timorense (CNRT), Augusto Domingos ‘Deker’, kondisera sidadaun ne’ebé hakarak falsifika dokumentu kombatente hodi hetan rekoñesimentu ka pensaun ruma husi Estadu ne’e krime.
“Iha lei estatutu kombatente libertasaun nasionál hatete klaru ona iha ne’eba katak, sé mak falsifika dokumentu hodi hetan benefísiu ilegál husi Estadu ne’e krime,’’ Deputadu Deker ko’alia iha resintu Parlamentu Nasionál (PN), kinta ne’e.
Tanba ne’e bainhira akontese kestaun hirak-ne’e hanoin responsabilidade pesoál simu ninia konsekuénsia rasik.
“Ba kontestasaun ne’e iha oin rua, hanesan kontesta dadus falsu katak ema-ne’ebé la envolve iha luta libertasaun nasionál, maibé hakarak favorese malu falsifika dokumentu hodi hetan benefísiu, di’ak liu hasai,’’ nia apela.
Notísia relevante: https://tatoli.tl/2025/02/19/pntl-halo-buska-domisiliariu-patrimoniu-fds-iha-nia-rezidensia-kovalima/
Tuir nia, tanba rekoñesimentu ba sidadaun ida ninia kontribuisaun iha partisiapsaun luta ba ukun-rasik an ne’e la’ós apoia sosiál, maibé ne’e rekoñesimentu pesoál ba sidadaun ida-ne’ebé mak konsege envolve, kolabora, kontribui no partisipa iha luta libertasaun. No daruak, iha kontestasaun ne’e ba timoroan sira ne’ebé konsege partisipa kontribui.
“Maibé, dehan hanesan ne’e o-nia partisipasaun sukat karik ho metru hira, no tetu ho dasi karik kilo hira, ne’e mak iha lei ne’e hatete o nia realidade mak determina o-nia direitu, ho realidade ida defende ida, realidade sanulu defende sanulu, la’ós falsifika no inventa,’’nia akresenta.
Tuir lei númeru 9/2009 jullu, alterasaun dahuluk ba lei númeru 3/2006, 12 Abríl ne’ebé ko’alia kona-ba estatutu kombatente libertasaun nasionál iha artigu 19 (falsifikasaun) alínea 1), hatetetn, ema-ne’ebé fó deklarasaun ka informasaun falsu ka falsifika dokumentu sira relasiona ho prova ativizmu iha luta ba libertasaun nasionál ho objetivu hetan direitu konsagradu sira iha lei ne’e, hetan kastigu tuir lei haruka.
Alínea 2) hatutan, bainhira aktu sira-ne’ebé temi iha númeru anteriór ne’e kombatente libertasaun nasionál mak hala’o, ne’e nafatin hetan kastigu tuir termu sira-ne’ebé hatuur iha artigu 11.
Notísia relevante:https://tatoli.tl/2025/02/13/kombatente-nain-11-sei-devolve-rihun-301-ba-estadu-tanba-falsifika-dadus/
Jornalista: Nelson de Sousa
Editór: Evaristo Soares Martins
