DILI, 20 Fevereiru 2025 (TATOLI)—Unidade Polísia Marítima (UPM) lori-fila ona peskadór Luís Mendes husi postu administrativu Likisá Vila, munisípiu Likisá, ne’ebé laloran tasi lori husi Likisá tama to’o illa Liran, Indonézia.
Insidente ne’e akontese iha segunda (17/2), iha-ne’ebé Luís Mendes nu’udár peskadór husi aldeia Leopa, suku Dato, postu administrativu Likisá Vila, sai husi uma iha tuku 05:00 dadeer bá tasi laran ho ró peska nian hodi soe rede halo atividade peska buka ikan iha área tasi Likisá nian.
Maibé, derepente ró ne’ebé nia lori liras tohar no mákina avaria. Ho situasaun ne’e, nia labele mai fali rai-maran tanba laloran boot. Nune’e, ondas lori peskadór ho nia ró to’o illa Kilis Satu área Liran nian no konsege salva husi komuidade iha-ne’ebá.
Tan ne’e, iha loron kinta (20/2), bazeia ba koordenasaun no kooperasaun Unidade Polísia Marítima (UPM) ho autoridade polísia Indonézia nian, UPM ho ró patrulla konsege bá lori-fila peskadór Luís.
Peskadór Luís Mendes haktuir nia sai husi uma iha Likisá iha loron (17/2) tuku 05:00 dadeer hodi bá buka ikan. Foun-foun ne’e, tasi di’ak hela entaun nia soe rede ikan maibé laloran boot, nune’e rezulta mákina ró mate depois laloran lori nia to’o Ataúru.
Nia dehan, momentu laloran lori nia to’o tasi Ataúru, rai nakukun ona entaun momentu ne’e laloran kontinua lori nia bá illa Kilis Satu. To’o illa ne’e, nia haree ahi lakan nia tama iha-ne’ebá no momentu ne’e nia hetan komunidade hatuun hela karau.
“Ha’u bolu sira no sira hanoin bosok, depois ha’u hakilar foin sira dehan ema ida husu ajuda. Entaun, ha’u ho ró tama fali husi fatin ne’ebé sira hatudu no ha’u konsege mai tiha rai-maran no sira ajuda dada tiha ró no foti tiha ikan ne’ebé ha’u kail ne’e hodi fahe malu. Nune’e, joven mane ida mak konsege lori ha’u bá hela hamutuk ho xefe suku ida nia uma,” Luís Mendes hateten ba jornalista sira iha Kuartél UPM, Sionál, Dili, kinta ne’e.
Nia esplika durante loron ida kalan ida nia iha de’it ró laran, nia han de’it mak paun fuan lima no bee aqua rua hodi aguenta to’o ema salva nia husi tasi laran mai rai-maran illa satu área Liran, Indonézia.
Nia konta katak momentu nia hetan insidente iha tasi laran, nia telefone mós monu iha tasi laran, nune’e labele komunika nia família sira.
Nia dehan, bainhira komunidade salva lori tiha bá xefe suku no iha xefe suku nia uma mak xefe suku hasai nia foto manda bá mana ida husi Vikeke hela iha Liran, nune’e mana ne’e halo postajen iha facebook depois virál mak ema foin hatene katak nia sei moris.
“Autoridade inklui komunidade iha-ne’ebá ne’e, trata ha’u di’ak loos. Ha’u agradese tebes bá sira tanba to’o ohin loron sira bele entrega ha’u bá fali ita-nia autoridade ho di’ak. Ida-ne’e ha’u agradese tebes,” nia adianta.
Peskadór ne’e hateten, ró ne’ebé nia uza hodi halo peska ne’e agora para iha Liran tanba kondisaun ladi’ak, maibé nia mákina inklui rede nia lori fila ona.
Entretantu, Komandante Unidade Polísia Marítima (UPM), Superintendente Eugénio Pereira, informa timoroan foin daudaun sai husi uma iha segunda madrugada ne’e bá halo atividade peska, maibé to’o loraik mós nia seidauk fila.
“Nune’e, família informa ba Komandu Polísia Likisá no sira informa mai ami no ami halo kedas Human Dezaster Respond ka Responde ba Dezastre Umanidade oinsá fó apoiu hodi responde ba ita-nia sidadaun ne’ebé hetan dezastre. Tan ne’e, ami koordena kedas ho Atase POLRI ka Embaixada Indonézia, depois hetan informasaun husi família sira,” nia afirma.
Nia hatutan, maski nune’e, UPM nafatin alarga informasaun iha parte Indonézia nian liuhusi koodenasaun ne’ebé UPM halo ho Autoridade Indonézia, hetan duni sidadaun ho naran Luís katak hetan salva ona hosi sidadaun sira iha parte Illa Indonézia iha Wetar.
“Depoisde ita lokaliza tiha sidadaun ne’e nia pozisaun, ita kontinua koordena ho Indonézia oinsá atu halo ninia transportasaun mai iha Timor. Felizmente, ohin ita orienta ita-nia ekipa ne’ebé iha Ataúru ne’ebé diretamente husi Postu Krema ninian, Ajente Abílio bá kedas iha illa Liran halo koordenasaun ho autoridade seguransa iha-ne’ebá hodi entrega fali ita-nia sidadaun ne’e,” nia informa.
Komandante Eugénio husu bá komunidade inklui peskadór sira atu halo atividade peska karik tenke kuidadu no bá peska karik lori telefone, nune’e buat ruma akontese bele kontatu ba família.
Iha fatin hanesan, Adidu Seguransa Indonézia ba Timor-Leste, Komisaris Besar Polisi (Kombes Pol), Don da Costa, hateten depoisde nia simu informasaun husi UPM katak iha sidadaun Timor bainhira halo atividade peska ho ró to’o tasi klaran, maibé derepente ondas lori bá to’o área Liran nian nune’e halo kedas koordenasaun ho autoridade Polísia Indonézia hodi buka tuir sidadaun referida.
“Ha’u kontatu kedas Diretór POL Air Polda NTT, diretór intelejen Polda NTT, KAPOLRES Atambua, Kapolres Kupang, Kapolres TTU, Kapolres Belu, Kapolres Alor no Kapolres Maluku Barat Daya, tan ne’e Kapolres Maluku Barat Daya hato’o ba ha’u katak sidadaun Timor ne’ebé ondas lori nian to’o Wetar ne’e iha kondisaun di’ak no agora komunidade iha fatin ne’ebá salva ona nia no mós TNI no polísia iha fatin ne’ebá,” nia haktuir.
Nia dehan, ho koordenasaun ne’ebé iha ohin konsege entrega sidadaun Luís bá Autoridade Polísia UPM hodi lori mai to’o fali Timor-Leste.
Nune’e mós, Embaixadór Indonézia iha Dili, Okto Dorinus Manik, hateten ohin Embaixada Indonézia entrega hikas sidadaun Timor ne’ebé hetan dezastre iha tasi laran bá fali família.
“Ida-ne’e atu hatudu katak Timor-Leste nia relasaun bilaterál ho Indonézia di’ak tebes-tebes. Kooperasaun ida-ne’e hatudu katak la’ós de’it liafuan maibé asidente sira hanesan ne’e akontese dalabarak ona no parte Indonézia sempre tulun polísia UPM halo salvamentu ba sidadaun sira ne’ebé ondas lori bá illa Indonézia nian,” nia konklui.
Jornalista: Natalino Costa
Editór: Xisto Freitas da Piedade
