DILI, 21 fevereiru 2025 (TATOLI)–Vise-Prezidente Asembleia Jerál Liga Futeból Timor-Leste (LFTL), Osorio Florindo, hateten kandidatu Ipolito Soares no Abrão Oliveira mak hatama ona dokumentu no sei kompete iha kongresu LFTL ne’ebé sei realiza iha 01 Marsu 2025 sai prezidente.
Notísia Relevante: Prezidente asembleia LFTL hatun ona despaixu ba vise-prezidente organiza kongresu
“Semana hira ba kotuk, ami anúnsia no iha formuláriu ba timoroan hotu ne’ebé hakarak kandidata aan ba lidera LFTL, maibé iha ema na’in-rua mak mai foti formuláriu no submete sira nia dokumentu. Sira na’in-rua mak Ipolito Soares esi-Prezidente Assalam FC no Abrão Oliveira eis-Prezidente Zebra FC. Sira na’in-rua mak konfirmadu atu avansa ba kompete iha kongresu ne’ebé sei hala’o iha fulan-Marsu,” Osorio Florindo hateten liuhusi konferénsia imprensa ne’ebé realiza iha Estádiu Munisipál, Dili, sesta ne’e.
Durante simu kandidatu na’in-rua nia dokumentu, nia dehan, sira-nia parte halo ona verefikasaun maibé prienxe duni kriteria ne’ebé komisaun fó sai tuir estatutu LFTL nian.
“Ami halo verefikasaun, kandidatura na’in-rua mai ho sira-nia pakote ida-idak, sira mai kedan ho sira-nia Vise-Prezidente na’in-tolu (3). Sira prienxe duni kriteria ne’ebé ami fó sai tuir estatutu no ami submete sira ba prosesu tuir mai hodi avansa ba kompete iha kongresu,” Osorio hateten.
Tuir kriteria ne’ebé iha kongresu ba hili estrutura LFTL foun klube sira-ne’ebé hamahan aan iha LFTL no fundadór mak iha direitu absoluta atu fó sira-nia votu iha kongresu. Tanba ne’e, klube hamutuk 25 mak sei partisipa iha kongresu ne’e.
Notísia Relevante: LFTL-FFTL hahú diskute asuntu tékniku-kalendáriu realiza liga
Jornalista : Hortencio Sanchez
Editór : Cancio Ximenes
