DILI, 05 fevereiru 2025 (TATOLI)—Prezidente Asembleia Jerál Liga Futeból Timor-Leste (LFTL), atual Ministru Transporte Komunikasaun (MTK) Miguel Manetelu hateten, hatun ona despaixu ba Vise-Prezidente Asembleia Osorio Florindo atu organiza kongresu LFTL iha fevereiru nia laran.
Notísia Relevante: LFTL sei realiza kongresu hili lideransa foun iha fevereiru
“Loos! Mandatu ba estrutura, ezekutivu liga nian termina ona, bainhira Prezidente liga iha tempu ne’ebá rezigna-aan. Ha’u hato’o ona despaixu ba Vise-Prezidente liga Octavio da Conceição atu organiza asembleia ida, maibé la konsege. Foin lalais ekipa ida ba hasoru ha’u tanba orgaun liga ne’e iha ezekutivu iha mós asembleia, maibé ha’u mak Prezidente ba Asembleia iha mós Vise ida mak Osorio Florindo, ha’u hasai ona despaixu ida ba nia, labele dada tan tenke organiza ona kongresu hodi hili estrutura foun,” Manetelu hateten ba Agência TATOLI iha Pantai Kelapa, Dili, ohin.
Nia dehan, despaixu ne’e nia asina ona no entrega ona ba Vise-Prezidente Osorio Florindo hanesan Prezidente bele organiza no prepara ona kongresu tanba ezekutivu sira-nia mandatu termina ona.
Nia hatutan, despaixu ne’ebé hasai husu atu kongresu hodi hili estrutura foun liga iha tempu besik no labele liu fulan-fevereiru, nune’e liga bele hala’o atividade ho di’ak atu labele implika talentu jogadór sira.
“Ita haree Federasaun Futeból Timor-Leste (FFTL) semangat loos hakarak apoiu liga bele la’o ona. Entaun orgaun liga tenke iha ona ezekutivu foun para organiza liga ne’e. Despaixu ha’u hatun ona fó kompetensia tomak ba Osorio Florindo mak organiza kongresu ne’e, ha’u labele tanba hanesan membru Governu servisu barak mak presiza atu halo no laiha tempu organiza tan kongresu,” nia tenik.
Antes ne’e, orgaun liga liuhusi nia Prezidente Interinu Octavio da Conceição hasoru ona FFTL hodi ko’alia kona-ba preparasaun liga nian ba kongresu.
Aleinde ne’e, orgaun liga mós hala’o ona reuniaun ho klube futeból hamutuk 21 ne’ebé iha direitu absoluta atu vota no hili prezidente LFTL foun iha kongresu.
Durante enkontru ho klube sira hatudu sinál pozitivu no konkorda atu hakaat ba kongresu hodi hamoris hikas lejitimidade estrutura liga nian no klube sira sei fihir figura di’ak ruma hodi lidera LFTL durante mandatu tinan haat.
Jornalista : Hortencio Sanchez
Editór : Cancio Ximenes
