DILI, 09 Abríl 2025 (TATOLI) – Governu Timor-Leste no Malázia sei asina memorandu entendimentu kona-ba kooperasaun iha ámbitu ensinu superiór nian.
Husi parte Ezekutivu Timor-Leste nian autoriza ona Ministru Ensinu Superiór, Siénsia no Kultura, José Honório Jerónimo, hodi asina akordu referidu.
Tuir nota husi Governu, memorandu ida-ne’e ho objetivu atu hametin kooperasaun entre nasaun rua ne’e iha setór ensinu superiór, liuhusi promosaun interkámbiu estudante, dosente no espesialista sira.
Aleinde ne’e, dezenvolve programa konjuntu iha área oioin, hanesan Edukasaun no Formasaun Téknika no Profisionál, Teknolojia Edukativa no Rekoñesimentu ba Kualifikasaun sira.
“Memorandu ne’e prevee mós kriasaun Grupu Traballu Konjuntu ida, ne’ebé responsavel ba koordenasaun atividade kooperasaun nian no garante implementasaun efikás ba inisiativa sira ne’ebé konkorda ona”, informa.
Durasaun inisiál husi memorandu mak tinan lima, ho posibilidade ba estensaun, no finansiamentu ba atividade sira sei deside hamutuk, tuir disponibilidade rekursu.
Jornalista: Arminda Fonseca
Editora: Maria Auxiliadora
