OEKUSI, 24 Abríl 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Rogério Lobato, akompaña husi Sekretáriu Rejionál sira halo diálogu ho komunidade iha suku Bene-Ufe, sub-rejiaun Nítibe.
Rogério Lobato informa katak objetivu husi vizita ne’e atu rona direta problema no preokupasaun komunidade nian, nune’e bele aposta ba iha Planu Asaun Anuál (PAA) ba Orsamentu Jerál Estadu (OJE) 2026 nian, tanba daudaun ne’e Autoridade RAEOA hahú diskute.
“Diálogu ohin ne’e importante, hanesan Prezidente Autoridade RAEOA, ha’u tenke mai hamutuk ho imi atu ko’alia ba malu hodi hatene sá problema mak imi enfrenta iha suku no aldeia, nune’e ami bele tau iha planu. Karik tinan ne’e ami la konsege fó solusaun, ita tau ba tinan 2026 nian”, Rogério Lobato dehan ba abitante sira iha sede suku Bene-Ufe.
Notísia relevante: Abitante Bene-Ufe husu Agrikultura Oé-Cusse vasina animál sira
Nia informa, iha dialogu ne’e aborda mós kona-ba komesa estrada, bee-moos, saúde, edukasaun, agrikultura no seluk-tan. Daudaun ne’e, projetu emerjénsia 27 mak implementa, maioria estrada rurál sira komesa di’ak ona hodi fasilita movimentu transporte no populasaun atu asesu bá merkadu, saúde no bá eskola sira.
“Projetu sira-ne’e hotu polítika Primeiru-Ministru nian atu hasai populasaun husi izolamentu, tanba durante tinan barak la halo manutensaun ba estrada sira. Entaun, povu atu fa’an sira-nia sasán, primeiru tenke halo estrada sira. Tan ne’e, ha’u mai iha ne’e ho Sekretáriu Rejionál sira hotu atu rona preokupasaun sira liga ba nesesidade komunidade nian, hanesan setór sira-ne’ebé presiza tau-matan iha baze”, nia informa iha ámbitu ne’e.
Iha biban ne’e, Jestór sub-rejiaun Nítibe, Agustinho Afulit, agradese ba Autoridade RAEOA, tanba liuhusi dilogu mak bele hatene no identifika problema komunidade nian iha baze.
“Bele mai rona direta povu nia lian, liuhusi dialágu abertu, nune’e bele konsidera atu fó solusaun iha futuru, liuliu ba estrada rurál sira, tanba iha parte Nítibe problema barak liu mak saúde, edukasaun no Estrada. Maibé, tinan ne’e, hahú halo ona reabilitasaun ba estrada sira”, nia dehan.
Notísia relevante: MS halo advokasia kona-ba Programa Malária iha suku Bene-Ufe
Durante diálogu komunitáriu ne’e, komunidade hato’o preokupasaun sira liuliu ba kontinuasaun estrada husi ponte Noefefan bá Citrana, peste ne’ebé ataka animál sira hanesan fahi, problema falta profesór iha eskola no populasaun balun seidauk asesu liña elétrika.
Jornalista: Abílio Elo Nini
Editora: Maria Auxiliadora
