DILI, 30 Abríl 2025 (TATOLI)-Embaixadór Repúblika Indonézia iha Timor Leste, Octo Dorinus Manic, hatete daudaun ne’e Ministériu Finansas (MF) no Ministériu Negósiu Estranjeiru no Kooperasaun Indonézia oferese hela bolsa estudu hamutuk 170 ba nasaun dezenvolvidu sira inklui Timor-Leste.
Oportunidade ne’e, embaixada Indonézia iha Timor-Leste sensibializa programa ne’e iha Sentru Kultural Indonézia, Mascarenhas Dili ba Timoroan sira ne’ebé iha interese atu kontinua estudu iha Indonézia.
“Ami oferese bolsa estudu hamutuk 170 ba nasaun dezenvolvidu sira hanesan Kamboja, Fiji, Papua Nova Guiné inklui Timor-Leste hodi kontinua sira nia estudu iha Indonézia”, dehan Embaixadór, Octo Dorinus Manic, ba jornalista sira iha PBI Dili, kuarta ne’e.
Nia dehan, rejistu ba bolsa estudu ne’e kompostu husi programa lisensiatura, mestradu no sei taka iha loron 23 Maiu 2025, tanba ne’e husu ba Timoroan ne’ebé hakarak rejistu atu prepara. Tanba sei teste ho língua Inglés hanesan lian estranjeiru, lian Indonézia no dokumentu sira ne’ebé iha relasaun atu bele hato’o ba Embaixada Indonézia no Sentru Kuturál Indonézia (PBI) ba prosesamentu tuir mai.
“Ita hein katak númeru aplikante bolsa estudu Timor-Leste nian sei boot liu duké nasaun dezenvolvidu sira seluk. Loos duni, programa bolsa estudu ida-ne’e kompetitivu tebes, maibé ha’u fiar katak Timor-Leste bele halo”, nia espera.
Embaixadór Manik husu ba Timoroan atu estuda maka’as, nune’e bele kompete ho nasaun seluk hodi hetan bolsa estudu ne’e, bele kontinua estudu iha Indonézia, nune’e bainhira fila mai bele kontribui ba dezenvolvimentu TL iha futuru.
Nia dehan sira ne’ebé maka liu iha selesaun sei tuir ezame iha fulan-Juñu nia klaran, no sira ne’ebé maka liu iha selesaun sei aranka iha fulan-Agostu.
“Ita iha universidade koñesidu hanesan Brawijaya, Padjajaran, Universidade Indonézia, Institutu Teknolojia Bandung (ITB), UGM no seluk tan. Tanba ne’e sira ne’ebé liu selesaun sei kontinua sira nia estudu iha fakuldade ne’ebé antes ne’e selesiona ona husi kada potensiál simu bolseiru iha universidade ida-idak”, nia konklui.
Notísia relevante:FDCH asina MoU ho universidade lima iha Indonézia
Jornalista : Osória Marques
Editora : Rita Almeida
