DILI, 16 Maiu 2025 (TATOLI) – Sekretáriu Estadu Asuntu Toponímia no Organizasaun Urbana (SEATOU) hamutuk ho Ministériu Obras Públikas (MOP) hetan orientasaun husi Primeiru-Ministru Kay Rala Xanana Gusmão atu loke espasu estrada diresaun Bairru-Pité ba Ailok-laran hodi prepara ba fúnebre amu Domingos “Maubere” nian iha segunda oin (19/05/2025).
Xefe gabinete MOP, Cristovão Fauto Guterres informa, atividade ohin lorin nian, MOP hetan orientasaun xefe Governu atu hadi’a estrada diresaun Bairru-Pité ba Ailok-laran nian hodi prepara ba fúnebre ba maktoban amu Domingos da Silva “Maubere”.
“Tanba ne’e ita hotu hatene katak tuir planu ne’ebé iha fó sai husi arkiodioseze Dili katak segunda-feira ita-nia amu Domingos “Maubere” sei ba haloot iha Ailok-laran. Bazeia ba orientasaun ne’ebe iha sira mós kontaktu direta kedas ba kompaña ida Tinolina, Lda, ne’ebé hetan tenderizasaun (konkursu públiku) ba hadi’a estrada iha área Bairru-Pité nian no harahun uma lima ne’ebé antes ne’e hetan afetadu”, xefe gabinete ne’e informa ba jornalista sira iha Bairru-Pité, Dili, ohin.
“Harahun uma sira-ne’e hodi loke tan espasu estrada, aterru estrada hahú husi merkadu Bairru-Pité to’o Ailok- Laran no ke’e drainajen ba bee-dalan”, nia akresenta.
Notísia relevante:Padre Domingos Maubere sei haloot iha Semitériu Padre Maloa
Xefe gabinete garante katak durante loron tolu nia sei esforsu hodi loke espasu no aterru dalan kaber uitoan, no parte kompaña sei servisu tuir kontratu ne’ebé iha katak servisu hahú tuku 8:00 dadeer to’o tuku 21:00 kalan mak ramata.
Entretantu, tuir informasaun ne’ebé ohin jornalista sira asesu katak, estrada ne’e sira sei loke ninia espasu luan 5.50 metru.
Jornalista: Alexandra da Costa
Editór: Rafael Ximenes de A. Belo
