DILI, 18 Maiu 2025 (TATOLI)—Sarani husi parókia oinoin, veteranu, judisiáriu, organizasaun naun-governamentál, partidu polítiku no entidade Governu hamutuk ho família Padre Domingos da Silva Soares Maubere nian, kontinua presta omenajen ba Amu Maubere iha Igreja Parókia Sagrado Coração de Jesus Bekora, domingu ne’e.
Veteranu Cornélio Gama “L7”, hateten uluk Padre Maubere kolabora ho FALINTIL sira iha ai-laran hodi luta ba autodeterminasaun, maibé agora Amu “Du” laiha ona, maibé hanesan amigu kontinua reza ba Amu nune’e bele hetan fatin di’ak iha mundu seluk.
“Hanesan belun, agradese tanba uluk ami bele servisu hamutuk iha ai-laran, maibé ita mós tenke hatene katak moris iha mundu ne’e temporáriu, loron ida ita sei filafali ba mundu seluk,” veretanu ne’e dehan ba jornalista sira iha Igreja Bekora, Dili.
Notísia relevante: Maktoban Padre Domingos Maubere to’o ona iha Parókia Bekora
Aleinde ne’e, Sarani Parókia Bekora, Maria Pinto, espresa sentimentu triste bainhira lakon Amu “Du” tanba Amu ne’e ema ne’ebé di’ak no gosta halibur sarani sira.
“Durante ne’e, Amu Du nia sentimentu boot ba ami. Nia halibur ema hotu, to’o nia mós halo programa ba ferik-katuas sira hodi partisipa iha loron kinta kada semana,” nia hateten.
Tuir observasaun TATOLI katak entidade sira-ne’ebé presta omenajen ba Amu Maubere mak hanesan Prezidente Tribunál Rekursu ho estrutura, Prokuradór Jerál Repúblika ho estrutura, Vise Primeiru-Ministru ba asuntu Ekonómiku, Konsellu Imprensa, Kámara Komérsiu no Indústria, SEKOOP, Prezidénsia Konsellu Ministru, SASCAS, HNGV, PN, APC, Komité Sentrál FRETILIN (CCF-sigla portugés) no seluk tan.
Jornalista: Alexandra da Costa
Editor: Xisto Freitas da Piedade
