DILI, 19 Maiu 2025 (TATOLI)—Kalan liki kapote metan (nakukun) hafalun rai Bali-Indonézia no Timor-Leste hakmatek ho ida-idak nia kmanek. Kalan ne’ebá, iha domingu (18 Maiu 2025), fihir ba ponteiru boot no kiik relojiu nian d hatuur aan iha tuku 11h00 oras Timor-Leste no tuku 9h00 oras lokál Bali nian.
Notísia Relevante: Boxista Delio Mouzinho-Daniel Belo sei kompete iha eventu HSS Bali
Iha kalan ne’e, boxista Timor-Leste, manu-aman Daniel de Asis Belo hahú hakbesik aan ba rin leten hodi basa liras no kokorek hodi kompete ho boxista manu-aman Krispinus Hulo husi Nusa Tenggara Timur-Indonézia iha eventu Eventu Boxe HW Sport Night (HSN).
Manu-aman Timor honaran istimadu Deniel de Asis Belo mantein iha nia prinsipiu, kaer metin dignidade no iha nia fuan prega ona nasionalizmu. Esperansa la hela de’it hanesan esperansa, manu-aman Daniel Belo konsege konkista nia vitória maske iha laloran boot nia klaran, iha uma-na’in Indonézia nia knua.
Maske nune’e, Deniel hatudu nia talentu hanesan boxista maibé la’ós hanesam premanizmu, Daniel nia performa iha rin leten ne’e halo nia adversáriu Krispinus Hulo susar atu kombate, tanba husi ronde primeiru de’it Daniel hatudu ona katak manu-aman ne’e lalika tau tara iha manu-futu fatin.
Tama ba Ronde segundu, Deniel nunka fó nia frakeza ba Krispinus halo Krispinus susar liután atu na’ok netik való ruma husi Daniel nia frakeza. Maske Krispinus lansa atake maibé atake hirak ne’e hela de’it hanesan atake tanba Deniel halo blokeia metin iha nia oin ho liman be falun ho “sarung tinju” kór mean ne’ebé sai hanesan Krispinus nia masin-kaut.
Jogu kontinua la’o, Deniel sempre fó tuku ho hook liman-karuk nian be makaas halo Krispinus tuku anin mak barak-liu ka tuku arbiru lakona alvu. To’o ikus, iha ronde da-haat, Deniel hetan pontu barak liu kompara ho Krispinus, nune’e Deniel mak iha direitu absoluta ba kampiaun.
Bainhira Deniel sai kampiaun hanesan tudik meik ida ne’ebé sona borus Krispinus ho nia treinadór no nia adeptus sira-nia fuan, no sira tenta halo barullu iha rin letan, maibé seguransa HSS konsege halo kalma, Deniel hiit kedan bandeira Timor-Leste iha anin leten hodi selebra nia vitória.
Vitoria ne’ebé Deniel hetan ne’e, la’ós entrega husi vandeija, la’ós hanesan oferta, maibé luta ho nia maneira rasik, luta ho nia esfirsu rasik, luta ho nia kosar-been rasik, bainhira hisik iha rin leten. Husi vitoria ne’e, fó lembra fali iha tinan 23 ba kotuk manu-aman Timor kokorek iha Tasi-Tolu Dili hodi fanun mundu tomak katak Timor-Leste restaura ninia ukun rasik-aan ona.
Ohin, domingu (18 Maiu 2025), manu-aman Timor ne’ebé reprezenta husi Deniel basa liras iha Bali Indonézia hodi doko Indonézia no mundu nia fuan katak Timor-Leste mós bele, Timor-Leste la’ós nasaun izoladu iha mundu nia matan. Manu-amana Daniel Kokorek iha dapur laran, kokorek ho lian nasionalizmu no patriotuzmu, to’o kokorek iha ema seluk nia uma leet hodi hamorin Timor-Leste nia naran liuhusi boxe. Parabens dba manu-aman Timor-Leste, Daniel de Asis Belo!.
Biografia badak Deniel
𝐍𝐚𝐫𝐚𝐧 𝐊𝐨𝐦𝐩𝐥𝐞𝐭𝐮: Deniel de Assis Belo
𝐈𝐝𝐚𝐝𝐞: Tinan 19
𝐍𝐚𝐬𝐢𝐨𝐧𝐚𝐥𝐢𝐝𝐚𝐝𝐞: Timor-Leste
𝐑𝐞𝐤𝐨𝐫𝐝 𝐏𝐫𝐨𝐟𝐢𝐬𝐢𝐨𝐧𝐚𝐥: Manán dala-tolu 3 (1 KO), 0 Lakon, 0 Impata
𝐏𝐞𝐫𝐬𝐞𝐧𝐭𝐚𝐣𝐞𝐧 𝐌𝐚𝐧𝐚𝐧 𝐊𝐎: 33,33%
𝐊𝐚𝐫𝐞𝐢𝐫𝐚 𝐏𝐫𝐨𝐟𝐢𝐬𝐢𝐨𝐧𝐚𝐥: 2024–agora
𝐄𝐬𝐭𝐫𝐞𝐢𝐚 𝐏𝐫𝐨𝐟𝐢𝐬𝐢𝐨𝐧𝐚𝐥: 25 Agostu 2024
𝐀𝐥𝐭𝐮𝐫𝐚: 5’6″ (168 cm)
𝐀𝐥𝐤𝐚𝐧𝐬𝐞: 65″ (165 cm)
𝐊𝐥𝐚𝐬𝐞 𝐓𝐨𝐝𝐚𝐧: Super Bantamweight (entre 122 lbs / 55,3 kg
𝐊𝐥𝐚𝐬𝐢𝐟𝐢𝐤𝐚𝐬𝐚𝐮𝐧 𝐍𝐚𝐬𝐢𝐨𝐧𝐚𝐥:
𝗥𝗲𝗸𝗮𝗽𝗶𝘁𝘂𝗹𝗮𝘀𝗮𝘂𝗻 𝗝𝗼𝗴𝘂 𝗣𝗿𝗼𝗳𝗶𝘀𝗶𝗼𝗻𝗮𝗹:
1.) 25 Agostu 2024–Bali, Indonézia
Adversáriu: Kaleb Putra Siregar
Rezultadu: Manán liuhusi desizaun esplitu (ronde 4) Eventu: HW Sport Night Vol. 2
Todan Klase Jogu: 120,3 lbs (54,5 kg)
2.) 30 Novembru 2024–Dili, Timor-Leste Adversáriu: Francisco Almeida
Rezultadu: Manán liu-husi desizaun esplitu (ronde 4) Eventu: WBC-Asia
Todan Klase Jogu: 125,8 lbs (57,0 kg)
3.) 9 Fevereiru 2025–Bali, Indonézia
Adversáriu: Sakti Hamonangan Manullang Rezultadu: Manán liu-husi TKO iha ronde da-3 (1:45)
Eventu: HW Sport Night Bali
Todan Klase Jogu: 120,0 lbs (54,4 kg)
𝗣𝗼𝘁é𝗻𝘀𝗶𝗮 𝗻𝗼 𝗗𝗲𝘇𝗲𝗻𝘃𝗼𝗹𝘃𝗶𝗺𝗲𝗻𝘁𝘂
Konforme komentáriu públiku (observadór boxe), Deniel de Assis Belo hatudu performa impresivu dezde hahú nia Estreia Profisional.
Ho manan dala-tolu (3) tutuir malu iha tempu ne’ebé badak, inklui manán TKO dala-ida (1) hatudu ninia forsa no tékniku ne’ebé garantidu iha ring leten.
Nu’udar Boxista foin-sa’e ho idade 19, Deniel iha poténsia boot atu dezevolvidu sai simbolu luta ba Boxe Timor ninian.
Eventu HSS
Eventu Boxe HW Sport Night (HSN) realiza iha Domingu, 18 Maiu 2025, iha Atlas Super Club, Canggu, Bali. Eventu HSS nian hahú iha tuku 17h00 oras Bali nian ho totál jogu 12. Transmisaun diretu disponivel iha plataforma Vidio HSS.
HSN hanesan eventu boxing ne’ebé hala’o hodi buka joven boxista Indonézia sira. Sira hein atu maximiza sira nia potensialidade hodi sai kampeaun mundial iha futuru.
Ida-ne’e maka kompetisaun boxe nian iha nivel nasionál no mós eventu desportu nian, ne’ebé konvida boxista internasionál sira. Eventu ne’e la’ós de’it ho objetivu atu hasa’e interese públiku ba mundu boxing nian, maibé sai mós fatin ba atleta joven sira hodi kompete.
Karik laiha mudansa, jogu 12 maka ajenda ona iha série eventu boxe HSN Bali nian iha loron 18 fulan-maiu tinan 2025. Tuir mai, sei iha eventu prinsipál 3 ne’ebé maka partisipa hosi boxista estranjeiru lubuk ida.
Jogu prinsipál tolu ne’ebé sei sai hanesan foku maka jogu Forlan Rivaldo vs Tyson Lahagu (Mektison) iha klase Super Flyweight. Depois Dewa Aji Sukma hasoru Hafiz Kareem iha klase Pezu Kmaan. No Yahya Garcia hasoru Umang iha klase Super Kmaan.
Entretantu, iha jogu 9 seluk ne’ebé inklui iha lista kartaun luta nian iha loron 18 fulan-Maiu tinan 2025.
Boxista internasionál lubuk ida mós partisipa iha eventu ne’e, inklui Mourad Omar husi Ejiptu, Khisrav Kuranbaev husi Rúsia, Rainmaker husi Áfrika Súl, Deniel de Assis Belo husi Timor Leste, no boxista feto husi Polónia, Alis.
Iha ne’e lista jogu boxe HSN Bali 2025 nian:
Pezu pezadu: Mourad Omar (Ejitu) hasoru Rabowo Surya (Indonézia)
Welterweight: Calisrox (Indonézia) Yunus Sasmita (Indonézia)
Super Flyweight: Don Phills (Indonézia) hasoru Frans Hutajulu (Indonézia)
Bantamweight: Biwa (Indonézia) hasoru Alis (Polónia)
Pezu kmaan: Khisrav Kuranbaev (Rúsia) hasoru Derry Julyawan (Indonézia)
Pezu médiu: Saroha Lumbantobing (Indonézia) hasoru Jemi Martins (Indonézia)
Super Pezu Médiu: Rainmaker (Áfrika Súl) hasoru Rey Marcelino (Indonézia)
Super Bantamweight: Deniel de Assis Belo (Timor Leste) vs Krispinus Soleman (Indonézia)
Super Flyweight: Forlan Rivaldo (Indonézia) hasoru Tyson Lahagu (Indonézia)
Pezu kmaan: Dewa Aji Sukma (Indonézia) hasoru Hafiz Kareem (Indonézia)
Pezu kmaan: Matheo Matias (Indonézia) hasoru Edi Guston (Indonézia)
Super Lightweight: Yahya Garcia (Indonézia) hasoru Umang (Indonézia)
Jornalista : Hortencio Sanchez
Editór : Cancio Ximenes
