DILI, 29 Maiu 2025 (TATOLI) – Governu aprova proposta rezolusaun ba Parlamentu Nasionál (PN) atu ratifika akordu liuhusi troka nota diplomátika entre Governu Timor-Leste (TL) no Malázia.
Ratifikasaun akordu ne’e kona-ba izensaun obrigatória vistu ba tipu pasaporte hotu-hotu mak hanesan diplomátiku, ofisiál ka servisu no odináriu nian.
“Ho ratifikasaun ba akordu ida-ne’e ho objetivu atu hametin liután relasaun ne’ebé iha ona, fasilita interkámbiu turístiku entre parte rua no kumpre kompromisu sira ne’ebé Timor-Leste asume ona iha ámbitu prosesu adezaun plena ba ASEAN”, refere nota husi Governu.
Lembra katak, iha 17 Dezembru 2024, Parlamentu Nasionál, ratifika ona akordu servisu aéreu entre Governu Timor-Leste no Malázia.
Iha tempu hanesan Vise-Ministra ba Asuntu ASEAN, Milena Rangel, hateten intensaun husi akordu ne’e aleinde loke tan Timor-Leste nia merkadu ba serbisu aviasaun nian no mós atu atinje objetivu Timor-Leste nian hodi adere ba ASEAN tanba tuir ajenda iha 2025, Malázia maka sei lidera organizasaun ne’e.
Akordu ne’e loke dalan ba investimentu iha área aviasaun iha ASEAN nia laran husi parseiru ne’ebé liga ho free trade agreement ho ASEAN, ne’ebé bele loke investimentu foun iha futuru.
Aleinde ne’e, Parlamentu Nasionál ratifika, iha Maiu ne’e, akordu entre Governu Timor-Leste no Laos relativu ba izensaun vistu ba fin turístiku ba titulár pasaporte komún nian.
Notísia relvante: https://tatoli.tl/2024/12/17/pn-ratifika-akordu-aeru-entre-tl-ho-malazia/
Jornalista: Arminda Fonseca
Editora: Maria Auxiliadora
