DILI, 17 dezembru 2024 (TATOLI)-Parlamentu Nasionál (PN), liuhosi reuniaun plenária aprova ona proposta rezolusaun hodi ratifika akordu servisu aéru entre Governu Timor-Leste ho Governu Malázia ho votu afavór 38, kontra 0 no abstensaun lima.
“Hodi nune’e akordu ne’e pasa,’’Prezidente Parlamentu Nasionál, Maria Fernanda Lay, fó sai iha sala plenária PN, (17/12).
Iha tempu hanesan Vise Ministra ba Asuntu ASEAN, Milena Rangel, hateten intensaun hosi akordu ne’e maka aleinde loké tan ita-nia merkadu ba serbisu aviasaun nian no mós atu atinje objetivu Timor-Leste nian hodi adere ba ASEAN tanba tuir ajenda iha tinan 2025, Malázia maka sei lidera ASEAN.
Governante, ne’e dehan, akordu ne’e loke dalan ba investimentu iha área aviasaun iha ASEAN nia laran husi parseiru ne’ebé liga ho free trade agreement ho ASEAN, ne’ebé bele loké ita-nia investimentu foun iha futuru.
Akordu serbisu aéru ne’e atu loke vou diretamente husi Malázia mai Dili Timor-Leste iha futuru tanba durante ne’e, Timor-Leste tenki tranzit iha Bali Indonézia maka foin bá Malázia.
“Ne’ebé ASA ida ne’e ho nia prinsípiu hanesan, nia padraun internasionál husi organizasaun internasionál aviasaun sívil mak kontinua aplika ICAO, mais ida ne’e atu fasilita liu-tán viajen entre país rua husi Malásia mai Timor-Leste, aleinde merkadu livre no mós loké ita-nia indústria aban bainrua iha turizmu, ne’ebé nia intensaun ne’e loke tan merkadu iha aviasaun nian,’’nia hateten
Jornalista: Nelson de Sousa
Editór: Agapito dos Santos
