DILI, 03 Juñu 2025 (TATOLI)-Prezidente Institutu Nasionál Seguransa Sosiál, Institutu Públiku (INSS, IP), Arlindo Pinto, informa INSS simu ona proposta funsionáriu reformadu husi Komisaun Funsaun (KFP) hamutuk 2.400, maioria husi profesór sira.
Númeru ne’ebé parte INSS simu, Arlindo Pinto hatete sei halo verifikasaun. Tanba, balun sei ativu no ne’ebé moras, la tama ona servisu.
“Ita mós simu hela husi setór privada, ba sira-ne’ebé rejime jerál hamutuk 381 inklui sira-ne’ebé simu pensaun sobrevivensia”, hatete nia iha ninia servisu fatin, ohin.
Konaba subrevivensia, nia hatutan Parlamentu Nasionál aprova ona, ne’ebé ninia parte hein de’it no simu proposta hosi entidade privadu sira-ne’ebé kontribui ba seguransa sosiál.
Notísia relevante: KFP rejista funsionáriu públiku idade reforma hamutuk 4.752
Prezidente Komisaun Funsaun Públika (KFP), Agostinho Letêncio, hatete reforma obrigatóriu ne’ebé sei akontese tinan oin hanesan dalan ida prepara joven sira no sira ne’ebé idade produtivu ba funsionáriu públiku.
Funsionáriu sira ne’ebé sei reforma, automatika tama iha sistema INSS hodi bele kobre sira-nia pensaun.
“Ita-nia estatutu funsaun públika depois hetan autorizasaun husi parlamentu ho lei númeru 7/2024 no ita halo ona alterasaun ba estatutu funsaun públika ho dekretu lei 9/2025 fó ona dalan ba funsionáriu sira ne’ebé mak atinje ona tinan 65 atu reforma”, dehan Agostinho Letêncio dehan.
Nia hatutan, lei ne’e foin promulga iha tinan-ne’e no tuir ita-nia planu hahú janeiru 2026 funsionáriu hotu-hotu ne’ebé mak atinje ona tinan 65 sei hetan reforma obrigatóriu.
Notísia relevante: Tinan oin KFP implementa reforma obrigatóriu ba funsionáriu
Jornalista : Osória Marques
Editora : Rita Almeida
