BOBONARU, 03 Junú 2025 (TATOLI)—Diretór Ezekutivu Hospitál Referál Maliana (HRM), José Marçal da Cruz, husu no orienta ba pesoál saúde na’in-54 ne’ebe foin lalais reklama sira-nia direitu servisu turnu ho oras estra ba Governu, atu kontinua hala’o kna’ar hanesan baibain tanba Ministeriu Saúde sei halo verifikasaun relatóriu no lista prezensa hafoin halo pagamentu.
Notísia Relevante: HRM rejista pasiente na’in-15 mate iha trimestre daruak
“Husu ba grupu profisionál da saúde ne’ebé servisu turnu no oras estra nafatin hala’o kna’ar hanesan baibain, labele fó kulpa ba ita-nia pasiente. Pasiente nu’udár ita-nia aman-inan, família, sira iha mak ita iha. Pasiente nu’udár sentru kuidadu husi profisionál saúde, asegura Patient Safety,” Diretór Ezekutivu, José Marsál da Cruz, hato’o kestaun ne’e liga ho konferénsia imprensa ne’ebé profisionál saúde hirak ne’e halo iha 13 Maiu 2025, ne’ebé deside hahú Juñu ba oin lakohi tama servisu turnu no oras estra tanba Ministériu Saúde seidauk selu sira-nia direitu hahú husi Dezembru tinan 2024 to’o Maiu 2025.
Nia dehan, bainhira la kumpre desizaun husi ezekutivu no Konsellu Diresaun Hospitál Referál Maliana (HRM) mak sei foti sansaun rigorozu hasoru profisionál saúde hirak ne’e.
“Tama oras shift normál, sei tau falta no hili opsaun muda ba fatin seluk ka sai husi funsionáriu públiku hodi aplika sansaun administrativu funsaun públika nian,” nia dehan.
Ezijénsia profísionál saúde na’in-54 husi parte ezekutivu ho konsellu diresaun hospitál hato’o ona ba Ministériu Saúde atu rezolve sira-nia direitu ne’ebé sei pendente hela.
Rezultadu husi karta ne’ebé hato’o, Ministeriu Saúde resposta katak IX Governu agora sei prosesa hela mudansa saláriu no enkuadramentu sira ba funsionáriu Ministériu Saúde nian.
Ezijénsia pesoál profisionál saude na’in-54 nian ne’ebé lakohi tama servisu oras estra no hakarak tama servisu normál kada loron, ida-ne’e sei la akontese tanba komunikasaun husi Ministériu Saúde mai esklarese prosesu ne’e iha baze.
“Ita Nia IX Governu konstitusionál ho lideransa Ministériu Saúde sei fó atensaun ba funsionáriu Ministériu Saúde tomak la’ós ba de’it grupu ne’ebé servisu turnu no oras estra, ne’ebé nia valór osan ne’e orsida tun orsida sa’e. Dokumentu mós la klaru halo ita atu sai vítima fali, sei halo verifikasaun,” nia hateten.
Responsável ne’e hatutan, servisu ida-ne’e pendente hela iha Governasaun anteriór labele rezolve, rezultadu husi mudansa saláriu rejime espesiál no rejime jerál, maibé Governu atuál sei halo esforsu hodi fó atensaun másimu.
“Ita-nia nai-ulun Ministériu Saúde sei deklara espsesiál ba nasaun RDTL, sei fó naroman ba ita hotu, sei tau matan ba asistente enfermeiru, enfermeiru Báziku, D3, S1, S2, parteira, TDTSP (Tékniku Diagnóstiku Terapeutiku, Saude Publiku), médiku jerál, mediku espesialista, ho espesialista ne’ebé atu enkuadramentu ba kargu xefia sira atuál. Ba futuru, tempu termina mandatu bele hetan netik rekoñesementu tanba Governu investe hodi hetan esperiénsia,” nia dehan.
Diretór Ezekutivu ne’e husu ba asosiasaun saúde iha Hospitál Maliana no iha Timor laran tomak atu organiza malu kontinua fó atendementu saúde tuir vizaun no misaun katak hamutuk atu hadomi povu no rai doben Timor-Leste.
“Planu Estratéjiku Nasionál Setór Saúde (PENSS) 2011-2030, saida mak ita atu halo no ita atu haree hamutuk ba povu no rai ida-ne’e. Ministériu Saúde iha tinan 2021-2025 husi konsolidasaun ba máturasaun, tinan 2026-2030 deskolajen sustentável, profisionál saúde kontente tanba povu kontente, espesialista timoroan kontente bainhira Povu/Pasiente kontente, hare equity no akses,” nia hateten.
Enkuantu, tuir dadus tinan 2025 totál funsionáriu iha Hospitál Referál Maliana hamutuk 152 ne’ebé kompostu husi funsionáriu permanente rejime jerál 101, Rejime Espesiál 11, kontratu termu sertu (7) no kazuál 33.
Notísia Relevante: SNAEM, I.P fó formasaun atendimentu emerjénsia ba ekipa ambulánsia HRM
Jornalista : Sergio da Cruz
Editór : Cancio Ximenes
