VIKEKE, 04 Juñu 2025 (TATOLI)—Diretór Servisu Ministériu Agrikultura Peska no Pekuária (SMAPPF) munisípiu Vikeke, Olivio Soares Freitas, informa estoke fini modo musan ne’ebé atu fó apoiu grupu ortikultura sira-ne’e to’o agora husi nasionál seidauk distribui ba munisípiu Vikeke tanba daudaun ne’e fini seidauk iha.
“Fini modo musan ba ortikultura ba tinan ida-ne’e nasionál seidauk distribui mai munisípiu. Iha tinan kotuk ita iha fini, maibé fini modo musan sira-ne’e hotu tiha ona. Ne’ebé, agora daudaun ne’e ita seidauk iha estoke fini modo musan hodi apoiu ba ita-nia grupu sira-ne’ebé implementa atividade ortikultura,” Olivio Freitas Soares ba Agência Tatoli iha nia kna’ar fatin, ohin.
Nia haktuir, daudaun ne’e iha MAPPF nasionál foin loke prosesu konkursu públiku ba sosa fini nian, nune’e hein bainhira mak iha empreza manán-na’in ba sosa fini.
“Fini modo nian la’ós laiha, iha maibé agora sei prosesu konkursu públiku, ne’ebé empreza seidauk hatama fini ba ministériu. Bainhira empreza sira hatama ona ba Ministériu mak ita sei distribui ba grupu agrikultura sira hodi kuda,” nia hateten.
Nia dehan, tinan 2024, SMAPPF Vikeke distribui fini hanesan modo mutin, brinjela, tomate, ai-dila hirak ne’e mak konsege fahe grupu agrikultura sira iha Vikeke.
“Ba tinan ida-ne’e, fini mai fali, ita sei fahe ba área poténsial sira-ne’ebé implementa atividade ortikultura. Nune’e mós ita sei haree grupu ortikultura sira-ne’ebé hatama pedidu ba ami no ami sei fahe ba sira odi kuda,” nia hateten.
Iha fatin seluk, koordenadór Grupu Hakbiit Família (GHF), Julio do Rosário, haktuir kona-ba fini modo musan grupu difisil atu hetan hodi sosa tanba fini sira-ne’e ema faan iha Vikeke laiha, entaun difikulta ba grupu sira implementa atividade ortikultura.
“Kona-ba fini ami sentesai difikuldade tanba ami buka iha Vikeke ema faan laiha, entaun atu kuda fini laiha. Liuliu fini hanesan modo mutin, ai-manas, brinjela no fini modo sira seluk. Espera ministériu bele ajuda ami liuliu ba fini,” nia hateten.
Nia dehan, GHF agora hahú prepara rai hodi implementa atividade ortikultura, maibé fini mak seidauk iha. Iha tinan kotuk (2024), GHF sosa fini modo musan ne’e iha Vikeke maibé tinan 2025 agora ba buka fali, atu sosa ema la faan ona.
Jornalista : Vitorino Lopes da Costa
Editór : Cancio Ximenes
