DILI, 04 Juñu 2025 (TATOLI) – Konsellu Ministru aprova projetu dekretu-lei kona-ba kriasaun subsídiu ba implementasaun projetu Eskola Superiór Edukasaun – RAIZ (ESE-RAIZ).
Subvensaun públika ne’e ho valór anuál másimu millaun $1 no sei aloka ba Fundasaun São Paulo Arkidioseze Dili, entidade fundadora Universidade Católica Timorense (UCT, iha portugés) nian.
Projetu ne’e aprezenta husi Ministru Ensinu Superiór, Siénsia no Kultura, José Honório da Costa Pereira Jerónimo.
“Proposta ne’e ho objetivu atu apoia kriasaun eskola universitáriu foun ida ne’ebé dedika liu ba formasaun inisiál profesór sira ensinu báziku no sekundáriu nian, hodi promove eselente iha edukasaun no valorizasaun ida ne’ebé maka’as ba lian portugés”, José Honório hateten iha Palásiu Governu, ohin.
Nia esplika ESE-RAIZ iha inísiu sei implementa iha UCT nia laran, hanesan unidade orgánika foun, ne’ebé adota autonomia akadémika, administrativa no finanseira.
“Medida ida-ne’e sei permite atu finansia kriasaun no funsionamentu unidade ensinu foun, hodi garante ninia autonomia akadémika, administrativa no finanseira, nomós prestasaun kontas no fiskalizasaun ba ezekusaun projetu ne’e”, konklui.
Jornalista: Arminda Fonseca
Editora: Maria Auxiliadora
