DILI, 12 Juñu 2025 (TATOLI) – Primeiru-Ministru, Xanana Gusmão, fahe sertifikadu ba joven Embaixadór Ekonomia Azúl na’in-14 ne’ebé hala’o ona serbisu voluntáriu durante Semana Mundiál Oseanu hodi konserva no prezerva ambiente tasi, liuliu fahe informasaun kona-ba ekonomia azúl no oseanu ba sosiedade.
Hafoin fahe sertifikadu, Xefe Governu ne’e husu ba joven embaixadór sira kontinua fahe informasaun ba populasaun atu kuidadu no proteje ambiente tasi ne’ebé fó oksijéniu ba animál tasi sira.
“Ha’u la fó parabéns, maibé apresia imi-nia partisipasaun no ezije atu kontinua saida maka imi halo ne’e, ami idade ona, maibé futuru nasaun imi-nia no imi-nia oan sira-nia liman”, Xanana Gusmão hateten iha Gabinete Fronteira Terrestre no Marítima, Palásiu Governu Dili, ohin.
Nia dehan atu proteje ambiente la’ós de’it komunidade, maibé joven sira tenke hadomi ambiente, liuliu tasi, tanba tasi importante tebetebes hodo fó nia oksijéniu.
“Imi hatudu bele! Aumenta tan konxiénsia husi joven sira seluk kona-ba proteje tasi. Husi apresiasaun ne’e atu fó lembra ba imi lorloron labele haluha tanba futuru hahú agora. Ita haree ba futuru ne’ebé di’ak, nune’e agora no kontinua ba oin, tanba Ha’u-nia Tasi, Ha’u-nia Timór, liafuan ha’u ne’e iha ne’ebé? Imi idaidak iha ne’ebá, ita hotu-hotu iha ne’ebá”, dehan.
Diretora-Ezekutiva Gabinete Fronteira Terrestre no Marítima (GFTM), Elizabeth Exposto, hateten joven embaixadór 14 ne’e durante Semana Mundiál Oseanu sira ho voluntáriu bá Manatutu, Oekusi, Ataúru, Ainaru no Lautein hodi fahe esperiénsia kona-ba konservasaun no prezervasaun tasi hodi hasa’e komunidade nia koñesimentu oinsá kuidadu tasi, liuhusi labele soe fo’er arbiru.
Nia dehan sira na’in-14 ne’e hetan ona formasaun ka treinamentu kona-ba ekonomia azúl ne’ebé Governu realiza iha tinan kotuk.
Joven Deonísio Rodrigues Pereira ne’ebé hetan sertifikadu apresisaun hateten atividade ne’ebé sira halo durante Semana Mundiál Oseanu mak ho ekipa bá Manatutu fahe informasaun kona-ba impaktu husi plástiku afeta ba oseanu.
“La’ós de’it oseanu maibé bá mós vida umana ninian. Ida-ne’e mak atividade ne’ebé ami hala’o iha Manatutu, iha workshop ne’e ita fahe fahe informasaun kona-ba lixu plástiku”, nia dehan.
Iha parte seluk mós halo diskusaun ho joven no estudante sira, loke diskusaun la’ós husu no hatán, maibé fó espasu ba sira hodi diskute no ko’alia rasik problema sira-nia ne’ebé hasoru iha komunidade no hamosu planu sira oinsá atu kontinua tau-matan ba seguransa ambientál nian no oinsá halo jestaun ba lixu plástiku sira.
Nia informa atividade ida-ne’e maski Semana Mundiál Oseanu ramata ona, maibé kontinua tanba ko’alia kona-ba asegura tasi presiza ko’alia mós kona-ba asegura rai.
“Bainhira ita bele asegura rai-maran, entaun lixu sira labele tun bá tasi. Ida-ne’e pasu di’ak hodi bele asegura sustentabilidade moris iha oseanu ninian”, konklui.
Notísia relevante: Governu lansa kampaña sensibilizasaun ekonomia azul no prezervasaun ambientál iha Aileu
Jornalista: Arminda Fonseca
Editora: Maria Auxiliadora
