VIKEKE, 12 Juñu 2025 (TATOLI)-Prezidente Autoridade Munisípiu (PAM) Vikeke, Francisco C.S de Gonzaga Soares, hamutuk ho Diresaun Programa Nasionál Dezenvolvimentu Suku (PNDS) lansa fatuk dahuluk ba konstrusaun estensaun sala rua iha eskola Ensinu Sekundáriu Jerál (ESJ) Paralelu Uagia, postu administrativu Osuu.
Ho lansamentu ne’e, autoridade ne’e husu ba ema hotu tau matan, tanba verba ba konstrusaun husi suku la’ós nasionál.
“Nu’udar Vikeke oan, presiza hamutuk lori dezenvolvimentu iha munisípiu Vikeke”, dehan nia iha serimonia hatuur fatuk dahuluk ne’ebé akontese iha suku Uagia, ohin.
PAM husu ba autoridade lokál no komunidade labele halo impedementu, maibé kolabora hodi alkansa dezenvolvimentu iha suku.
Diretór PNDS munisípiu Vikeke, Francisco S. Varela, hateten lansamentu ne’e reprezenta ona postu administrativu lima iha implementa programa PNDS hamutuk 40, iha suku 36.
“Programa ne’e ita-nia, ita mak sai na’in, ne’e duni husu ba autoridade sira kolabora ho PNDS hodi implementa programa sira iha suku. Ha’u fiar katak suku seluk mós bele hahú implementa”, nia akresenta.
Projetu ne’e nia dehan gasta $25,945.13 ho badaen husi komunidade, durasaun fulan tolu ne’ebé sei finaliza iha fulan-Setembru 2025. “Hahú ohin ba oin badaen sira bele halo sira nia servisu”.
Xefe suku Uagia, Aquilis X. Guterres, agradese ba autoridade no komunidade ne’ebé marka prezensa iha lansamentu ba projetu ne’e.
Eskola referida ho totál estudante hamutuk 131, profesór sira ne’ebé ativu hanorin hamutuk ema na’in-16.
Notísia relevante: Implementasaun projetu PNDS 43 iha Vikeke atinje ona 83.56%
Jornalista : Vitorino Lopes da Costa
Editora : Rita Almeida
