OEKUSI, 16 Juñu (TATOLI) – Autoridade Rejiaun Administrativa Espesiál Oekusi Ambeno (RAEOA) liuhusi Sekretáriu Rejionál ba Asuntu Saúde, segunda ohin, halo lansamentu ba postu saúde foun ida iha aldeia Mahata, suku Kutete, sub-rejiaun Pante Makasar.
Notísia relevante:Autoridade RAEOA sei estebelese tán postu saúde ida iha aldeia Mahata
Sekretáriu Rejionál ba Asuntu Saúde, Luís de Jesus Neno, informa estabelese postu saúde ne’e importante atu fasilita komunidade sira iha aldeia Mahata, tanba durante ne’e asesu ba sentru saúde Kiomaonteko no Ospitál Referál Oekusi, do’ok.
“Polítika Autoridade nian ba tinan ne’e, ita hakarak hakbesik fasilidade saúde ba komunidade sira, fatin ne’e tinan kotuk ami mai survei ona, ami nota katak, priénxe duni rekezitu, tanba komunidade uma-kain 287 ho populasaun 1.325 mak asesu, depois fatin ne’e mós preparadu maske iha kontainér de’it, maibé AC no mobiliáriu hanesan meza, kadeira no ármariu. Entaun ita utiliza sai postu saúde ida tanba fatin ne’e uluk komemorasaun tinan 500 Lifau nian, uza ba fatin bainaka sira husi nasaun viziñu, agora ita funsiona hikas, tanba durante ne’e la utiliza,” nia informa iha ámbitu lansamentu ne’e.
Hafoin halo lansamentu, parte saúde mós destaka kedas pesoál saúde na’in-lima, komposta husi médiku, infermeira, parteira, asiténte ida no administrasaun.
“Sira na’in-lima mai iha ne’e, atu fó atendimentu ba komunidade Mahata tomak, ha’u espera servisu hamutuk ho sira, tanba programa hotu sei hala’o hotu iha ne’e, bele tetu labarik, halo imunizasaun, tratamentu ba inan isin-rua, no moras seluk-tan, karik la konsege rezolve mak sei refere ba sentru saúde ou bele ba Ospitál Referál Oekusi,” nia informa.
Notísia relevante:Autoridade RAEOA planu mellora programa atendimentu saúde iha fatin izoladu hitu
Iha biban ne’e, Xefe Suku Kutete, José António Bana, hato’o agradese ba Governu liuhusi Autoridade RAEOA tanba estabelesimentu postu saúde ne’e sei fasilita komunidade sira.
“Ha’u agradese tanba suku Kutete iha ona fasilidade saúde rua ida iha foho ida iha vila, ne’ebé Governu kria polítika ajuda tebes ha’u-nia komunidade sira. Durante kuandu ba konsulta iha sentru saúde ka ospitál gastu $2,50 sentavús ba mai, maibé agora ba oin sira bele la’o ain de’it, tanba besik hela,” nia orgullu.
Nu’udar autoridade komunitária, nia dehan sei informa tutan ba komunidade sira-ne’ebé hela iha aldeia Mahata, liuliu bairru Upmetan, no maluk sira iha aldeia Bausíu, suku Nípani, mós bele mai asesu iha postu saúde ne’e.
Entretantu, totál postu saúde iha RAEOA hamutuk 21, sentru saúde lima, Ospitál Referál ida no fatin tratamentu saúde iha suku no aldeia hamutuk 11 ne’ebé estabelese ona iha sub-rejiaun Pante Makasar, Oésilo, Pássabe no Nítibe.
Notísia relevante:Autoridade RAEOA lansa programa atendimentu saúde iha fatin izoladu 11
Jornalista: Abílio Elo Nini
Editór: Florencio Miranda Ximenes
