DILI, 18 Juñu 2025 (TATOLI) – Konsellu Ministru (KM) aprova proposta Timor-Leste nian kona-ba oferta asesu ba beins merkadu ASEAN iha ámbitu prosesu negosiasaun adezaun Timor-Leste nian ba organizasaun internasionál ne’e.
Vise-Ministra ba Asuntu ASEAN, Milena Rangel, esplika katak oferta atu hetan asesu ba merkadu ASEAN ne’ebé aprezenta husi Timor-Leste iha ámbitu prosesu adezaun plena bazeia ba Akordu Komérsiu Merkadoria ASEAN (ATIGA) no kompostu husi aprezentasaun lista produtu ho kompromisu atu hamenus neineik tarifa aduaneira nian ne’ebé aplika ba sasán sira ne’ebé importa husi Estadu-membru sira.
Nia dehan oferta sira-ne’e ho objetivu atu halakon barreira komersiál no aliña rejime aduaneiru nasionál ho regra sira merkadu komún ASEAN nian, nune’e mós prevee salvaguarda atu proteje setór sensivel sira produsaun nasionál nian.
“Loron rua liubá, primeiru-ministru halo enkontru interministeriál ida ne’ebé membru Governu hotu partisipa hodi haree kalendáriu atu submete ita-nia kompromisu balun ne’ebé ita tenke haruka ba ASEAN. Tanba ne’e mak ohin ita mai haree filafali kompromisu asesu ba merkadu nian ba beins atu komesa negosiasaun ho Estadu-membru ASEAN sira”, Milena Rangel hateten iha Palásiu Governu, ohin.
Nia dehan rekizitu ida-ne’e estipula iha roteiru ne’ebé Timor-Leste implementa hela to’o Outubru. Tuir informasaun, entre Governu no ASEAN halo komunikasaun balun pelumenus to’o Outubru ka fin de Setembru Timor-Leste tenke finaliza ona ATIGA.
“Daudaun ita ko’alia kona-ba beins nian, liuliu sasán ita laiha problema barak ba ita-nia instrumentu doméstika ida. Pratikamente, ita-nia instrumentu legál sira ne’ebé eziste iha ita-nia rai-laran ne’e iha ona armonizasaun no aliña ho ASEAN nia padraun sira”, governante ne’e salienta.
Notisía relevante: Governu aprova Lista Rezerva Adezaun ba Akordu Abranjente Investimentu ASEAN
Jornalista: Arminda Fonseca
Editora: Maria Auxiliadora
