DILI, 23 Juñu 2025 (TATOLI)–Autoridade Munisípiu Dili (AMD) konsidera presiza halo sensibilizasaun ba komunidade kona-ba regra soe foer no ninia impaktu sira, molok autoridade aplika koima ba pesoál ne’ebé la kumpre regra.
Prezidente Autoridade interinu Munisípiu Dili, António Agosto Guterres, hateten, presiza duni iha regra ne’ebé bele regula sidadaun sira atu labele soe foer arbiru.
“Tanba ne’e, ita tenke sosializa hikas filafali no fó hanoin ba ema hotu atu esklaresidu, edukasaun sívika tenke la’o bazeia ba regra impedimentu ne’ebé veinkula katak, ema soe lixu arbiru karik fó koima,” Prezidente Autoridade interinu informa ba Ajénsia TATOLI via telefónika, Segunda ne’e.
Notísia relevante : INSPTL no AMT dezenvolve módulu treinamentu ba jestaun lideransa iha saúde primária
Nia dehan, Autoridade lokál sira presiza fó sosializasaun uluk lai ba komunidade.
“La’ós tanba levantamentu iha órgaun soberanu ida depois órgaun ezekutivu hakfodak la’o nonok de’it, entaun ida-ne’e mós la edukativu. Ema dehan eduka para iha faze implementasaun ne’e ita tenke liuhusi prosesu ida hafoin to’o iha ne’ebá bele forma komunidade nia karakter no mentalidade atubele dezenvolve sidade ne’e rasik,” Autoridade munisipál ne’e katak.
Nia rekoñese, eduka hodi liberta, katak oinsá komunidade bele liberta sira-nia an husi risku hodi kontribui apoiu ba sidade ne’ebé moos atu sidade ne’e bele nabilan.
Jornalista : Alexandra da Costa
Editora : Julia Chatarina
