DILI, 24 Juñu 2025 (TATOLI)–Komisaun Antí Korrupsaun (CAC-sigla portugeza), konstitui ona governante ho inisiál EdSC iha Sekretaria Estadu Igualdade no Inkluzaun (SEII) ba arguida relasiona ho suspeitadu ba falsifikasaun orsamentu viajen ba munisípiu 13.
“Ita-nia membru Governu ne’ebé mak mai presta informasaun iha Komisaun Antí Korrupsaun, delegasaun ita simu ita hala’o tuir kompeténsia ne’ebé CAC iha. Konserteja CAC investiga kazu sira-ne’e liga ho ita-nia membru Governu sira-ne’ebé suspeita ba krime. Atu falsifika dokumentu ka atu utiliza sasán la tuir nia regra, ne’e investigasaun mak sei hatudu,” Komisáriu Komisaun Antí Korrupsaun (CAC-sigla portugeza), Rui Pereira dos Santos, hateten ba jornalista sira iha nia kna’ar fatin, Faról, Dili, tersa ne’e.
Nia dehan, atu konstitui ema ida sai arguidu/a ne’e tenke liuhusi prova, prova ne’e maihusi ne’ebé, prova ne’e maihusi dokumentál, maihusi sasin sira liuliu ba ema na’in sira-ne’ebé envolve ne’ebé konfesa dehan sira halo ka la halo nune’e mak Ministériu Públiku liuhosi CAC bele konstitui ema ne’ebé sai interveniente prosesuál.
Notísia relevante: Suspeitada falsifika orsamentu viajen, CAC bolu governante ho inisiál EdSC
Nia relata, iha ema na’in-tolu mak CAC konstitui ona sai arguidu iha prosesu ida-ne’e.
“Ha’u hanoin iha membru Governu, iha kargu xefia sira balun ne’ebé mak sei hamutuk iha prosesu ne’e nia laran. Ha’u hanoin sira-ne’ebé mak sai arguidu ka arguida iha prosesu ne’e mak bele ema na’in-rua ka ema na’in-tolu, konforme prosesu ne’e la’o, tanba ami rekolla hela informasaun sira-ne’e liuhusi deklarasaun sira-ne’ebé mak sira mai fó,” nia afirma.
Rui dehan, CAC sei halo análize ba relatóriu sira husi investigasaun nian ne’e iha relatóriu provizóriu ne’e iha ema na’in-tolu mak sai ona arguidu ba kazu ne’e maibé ne’e depende ba relatóriu finál.
“Relatóriu finál mak ita sei hatene ema hira mak konstitui hanesan arguidu. Ba kazu sira hanesan ne’e CAC bele konklui investigasaun iha prazu loron 30 to’o loron 90, depende ba delegasaun kompeténsia husi Ministériu Públiku atribui bá CAC. Maibé, ha’u hanoin ba kazu ne’ebé mak iha Sekretaria Estadu Igualdade Inkluzaun ninian prosesu ne’e ami notifika ema lubun boot ida tiha ona,” nia konklui.
Jornalista: Natalino Costa
Editór: Xisto Freitas da Piedade
