DILI, 24 Juñu 2025 (TATOLI)–Governu liuhusi Autoridade Nasionál Petróleu (ANP) hakarak koopera ho kompañia Caltech hodi jere lixu iha kampu petrolíferu, Bayu-undan.
Vise-Prezidente ANP, Quintino Pereira, hateten, atu konkretiza kooperasaun ne’e maka ANP sei oferese mákina sunu lixu (inzeneratór) ida ba munisípiu Dili liuhusi kompaña Caltech ho razaun projetu Bayu-undan iha ona faze suspensaun ba operasaun no produsaun.
“Entaun lixu sira-ne’ebé ita prodús husi fasilidade Bayu-undan tenke lori mai Timor. Maibé bainhira lori mai ita-nia fasilidade seidauk iha, entaun ita konsidera Caltech hanesan kompaña lokál ne’ebé iha kapasidade téknika, finanseira, no esperiénsia di’ak loos ba prosesu resiklajen,” Vise-Prezidente ANP informa iha instalasaun kompañia Caltech, Beduku, Tersa ne’e.
Notísia relevante : Governu hakarak transforma Bayu-Undan sai sentru rejionál armazenamentu karbonu subterráneu
Mákina inzeneratór mai husi Singapura tanba mákina iha munisípiu Dili seidauk iha esperiénsia naton hodi jere lixu sira iha Bayu-Undan inklui iha Tibar.
“Ami tau kompañia Caltech hamutuk ho Project Manjement Unit nia ema sira hodi haree lixu ne’ebé mai husi Bayu-undan kontinua jere iha Caltech temporáriamente,” nia katak.
Tipu lixu ne’ebé lori husi Bayu-Undan ne’e hanesan lixu ho kategoria non merkúriu.
“Ita mós koordena ho Autoridade Munisípiu Dili hodi serbisu ho kompañia Caltech atubele rezolve lixu ho kuantidade boot tanba daudaun ne’e Caltech prodús resiklajen lixu ho kuantidade tonelada 3 no ba oin oinsá mak sira bele halo liu,” nia tenik.
Vise-Prezidente reforsa, kondisaun ne’e para neneik ba neneik bele rezolve lixu sira ne’ebé butuk iha Tibar, tanba ne’e ANP sei estabelese ekipa téknika ida hodi haree serbisu ne’e ba oin.
Jornalista : Alexandra da Costa
Editora : Julia Chatarina
