DILI, 25 Juñu 2025 (TATOLI) – Vise-Ministra ba Asuntu ASEAN, Milena Rangel, hateten timoroan sira iha Izraél iha kondisaun di’ak no daudaun Governu kontinua halo komunikasaun ho sira.
Governante ne’e dehan relasiona ho funu entre Izraél no Iraun, Ministériu Negósiu Estranjeiru no Kooperasaun (MNEK) hamutuk ho Embaixada Izraél nian iha Singapura, koordena malu atu asegura timoroan sira-nia viajen mai país.
“Sira ne’e maioria akaba ona sira-nia estudu, ne’ebé hein konklui atu fila. Balun fila ona mai iha Bali neste momentu. Daudaun iha hela koordenasaun entre ita no Embaixada Izraél nian akredita iha Singapura no iha Timór, tanba akontesimentu sira ne’e ita-nia pontu entrada halo komunikasaun mak ho embaixada”, Milena Rangel hateten iha Palásiu Governu, ohin.
Nia esplika katak ho situasaun funu entre Izraél no Iraun, Governu tenta fó oportunidade no akomoda hotu timoroan sira atu fila, maibé ida-ne’e filafali ba idaidak nia desizaun.
“Karik situasaun piór, ita sei koordena ho Embaixada Izraél nian iha Singapura para asegura duni no halo protesaun ba timoroan iha Izraél. Governu no Estadu iha responsabilidade tomak atu garante katak sidadaun sira ne’ebé iha Izraél seguru no bele filafali mai”, nia salienta.
Relasiona ho funu iha médiu orienta, deputadu husi Komisaun B iha Parlamentu Nasionál ne’ebé trata Asuntu Negósiu Estranjeiru, Defeza no Seguransa, Natalino dos Santos, husu ba Ministériu Negósiu Estranjeiru no Kooperasaun atu tau-matan ba timoroan sira iha Izraél.
“Konforme informasaun iha notísia, ita preokupa tebes ho situasaun ne’e. Entaun, husu ba Governu, liuliu MNEK atu kontaktu ho ita-nia embaixada sira iha rai sira ne’ebá hodi bele tau-atensaun”, nia dehan iha Parlamentu.
Notisía relevante: Estudante timoroan na’in-15 ne’ebé hala’o estudu iha Israel to’o ona iha Bali
Jornalista: Arminda Fonseca
Editora: Maria Auxiliadora
