DILI, 27 Juñu 2025 (TATOLI) – Ministru Obra Públika (MOP), Samuel Marçal, enfatiza katak estrada husi Ponte B.J Habibie, Bidau Senggol to’o Kuluhun sei la halo ba jardín, maibé kontinua halo ba pista rua.
Estrada husi Ponte B.J Habibie to’o Kuluhun hanesan projetu-pilotu ida intregradu, ne’ebé sei halo konstrusaun ba rede eletrisidade subterránea, hakoi kanu bee-moos no halo drainajen, no daudaun serbisu kontinua la’o.
“Importante mak ita hadi’a uluk estrada ne’e. Dalaruma ita halo estrada ne’e hanoin de’it mak ba ema ne’ebé iha transporte, maibé tenke hanoin mós komunidade barak ne’ebé la’o ain. Iha ne’ebá la’ós halo jardín, maibé hadi’a fatin la’o nian, sei tau estasionamentu, no kuda ai-oan ruma iha dalan ninin, nune’e bele fó mahon ba ema la’o ain”, Samuel Marçal hateten ba Tatoli, iha Palásiu Governu, Dili.
Tuir nia, bainhira projetu integradu ne’e susesu mak sei implementa mós ba fatin sira seluk.
Notisía relevante: Rede eletrisidade subterránea sei komesa entre Ponte Habibie no Bekora
Governu kontrata empreza Montana Diak Unipessoal Lda mak daudaun halo hela serbisu iha fatin referidu ho montante orsamentu millaun $2,3.
Antes ne’e, Prezidente Komisaun E Parlamentu Nasionál, ne’ebé trata Asuntu Infraestrutura, Marcos Xavier, husu ba Ministériu Obra Públika atu kria polítika di’ak ba reabilitasaun no alargamentu estrada iha Dili.
“Iha Senggol ne’e uluk sira dehan loke estrada aumenta tan jalur rua, maibé agora ita halo fali jardín, tanba dezeñu no BoQ seidauk iha, ita halo. Ne’e mak husu ba MOP tenke haree didi’ak molok atu implementa, de repente ita bá halo, laiha dezeñu no BoQ, ida-ne’e mak akontese”, nia dehan.
Deputadu husi bankada CNRT ne’e rekomenda ba MOP tenke haree didi’ak planta no kadernu enkargu (BoQ, iha inglés) hodi halo planu ne’e dala ida de’it, labele halo tiha planu ida depois ba halo fali seluk.
“Se laiha [BoQ] oinsá mak ita atu garante kualidade obra? Oinsá ita labele hatene tanba kualidade ne’e ita haree husi dezeñu no BoQ no iha terrenu halo tuir ka la’e?”, nia tenik.
Notisía relevante: Komisaun E sujere ba MOP kria planu adekuadu ba alargamentu estrada iha Dili
Jornalista: Arminda Fonseca
Editora: Maria Auxiliadora
