DILI, 02 Jullu 2025 (TATOLI)—Antigu Sekretária Estadu Komunikasaun Sosiál iha Governu Konstitusionál da-lima (V) no atuál Ministériu Juventude Desportu Arte no Kultura (MJDAK), Nelyo Isaac Sarmento, hateten alterasaun lei komunikasaun sosiál tenke define interrese hotu-hotu la’ós interrese individu.
Notísia Relevante: Editór no Jornalista nia esperansa ba alterasaun lei Komunikasaun Sosiál
Nia hatutan, Timor-Leste iha tan lei balun ne’ebé sei paradu uitoan ho lei jerál komunikasaun sosiál ne’ebé define iha nú. 5/2014 ne’ebé daudaun ne’e la’o hela.
“Maske ha’u seidauk hatene kona-ba bainhira mak altera lei komunikasaun sosiál ne’e, maibé depende ba Sekretária Estadu Komunikasaun Sosiál (SEKOMS), Expedito Dias Ximenes nia ideia ne’ebé sei partilla hamutuk,” Governante ne’e hateten ba jornalista hafoin ramata reuniaun Konsellu Ministru iha Palásiu Governu, Dili, ohin.
Nia husu ba implementadór sira bainhira atu altera lei komunikasaun sosiál tenke halo fali konsultasaun didi’ak ho organizasaun mídia ka órgaun komunikasaun sosiál sira inklui jornalista sira hotu.
“Tanba, agora ita iha ona plataforma oioin ka uza teknolójia informasaun oioin, entaun bainhira ita halo buat ida ita tenke hatene atu reprezenta servisu mídia ne’e ba oin. Entaun, desizaun ne’e para bele akumula ema-nia interrese hotu-hotu la’ós interrese individu de’it,” nia esplika.
Ministru ne’e reforsa, tempu agora ne’e presiza halo uluk lai konsultasaun ba artigu ne’ebé mak atu altera, hodi rona ideia barak liután husi organizasaun mídia sira inklui jornalista sira hotu, para halo lei komunikasaun sosiál ne’e sai riku ho pensamentu ne’ebé mak barak.
Jornalista : Alexandra da Costa
Editór : Cancio Ximenes
