KOVALIMA, 04 Jullu 2025 (TATOLI )- Autoridade Protesaun Sivíl (APC-sigla Portugés), munisípiu Kovalima prontu servisu hamutuk ho Diresaun Floresta atu halo reflorestasaun hodi redús dezastre naturál.
Komandante APC Kovalima, Celestino Ferreira Afonso, dehan prontu servisu hamutuk ho Floresta atu halo reflorestasaun liuhosi kuda ai-oan tanba kada tinan tempu udan Kovalima sempre mosu dezastre naturál ho tipu oi-oin.
“Atu halo prevensaun no metigasaun ba risku dezastre naturál ne’ebé akontese iha ita-nia munisípiu. Ita hotu esforsu saida mak ita bele halo atu hamenus risku dezastre naturál iha ita rain rasik liuhusi kuda ai”, Komandante APC munisípiu Kovalima, Celestino Ferreira Afonso dehan, ba jornalista iha Kovalima ohin.
Komandante APC Kovalima ne’e fó hanoin liliu ba inan-aman sira ne’ebé hela iha foho lalika taa ai arbiru liuliu halo toos hafoin husik hela toos la kuda fali ai-oan , ikus mai iha tempu udan hamosu risku dezastre naturál ho tipu oi-oin.
Ho aktu ne’e, nia dehan bainhira tempu udan parte kosta sul sempre mosu dezastre naturál ho tipu oi-oin hanesan inundasaun, erozasaun, anin-sobu uma no ahi han-uma.
Fó hanoin fali katak bazeia ba dadus ne’ebé fó sai husi Autoridade Protesaun Sivil katak,vítima dezastre naturál hahú 2022-2023 hamutuk 139 ho tipu dezastre rai halai, ahi han-uma no anin sobu komunidade nia uma.
Prosesu APC halo verifikasaun hetan estragu ho tipu sira hanesan aat kaman 67, aat naton 24 no totál vítima dezastre naturál simu ona materiál rekuperasaun hamutuk 47
Dadus Vítima Dezastre naturál iha 2024 hamutuk uma-kain 88 ne’ebé prosesu hela atu hetan materiál rekuperasaun
Jornalista:Celestina Teles
Editór: Florencio Miranda Ximenes
