DILI, 04 Jullu 2025 (TATOLI)—Institutu Mídia Australian Broadcasting Coorporation International Development (ABC ID) hala’o servisu hamutuk ho Agência TATOLI, Institutu Públiku (TATOLI, I.P) hodi apoiu no dezenvolve servisu jornalizmu nian ho di’ak liután.
Jornalista Seniór ABC ID, Stuart Watt, informa prezensa ABC ID iha Agncia TATOLI ho objetivu atu haree no dezenvolve kona-ba área jornalizmu nian, tanba Agência TATOLI hanesan mídia Estadu nian, entaun presiza fó sai informasaun ne’ebé kredivél ba públiku.
“Durante semana rua, ekipa ABC ID sei tau prioridade importante lima ne’ebé sai hanesan objetivu husi servisu hamutuk ne’e mak hanesan; Primeiru, hakarak koko aprende di’ak liután servisu jornalismu nian liuliu oinsá TATOLI nia produsaun notísia husi editoriál. Daruak, akompaña enkontru iha editoriál nian, ne’ebé enkontru ne’e envolve de’it ekipa editór sira hodi define halo avaliasaun ba servisu jornalista nian, Datoluk, hala’o enkontru mós ho ekipa jornalista sira ho koordenadór kobertura hodi hamosu idea foun ba asuntu kobertura (proyeksi). Dahaat, aprende mós ho servisu ekipa multimedia nian oinsá kria thumb nail ne’ebé interresante no halo headline ne’ebé di’ak bainhira publika iha kanál youtube. Dalimak, fahe opiniaun ba malu entre ABC ID no Ajénsia TATOLI hodi define saida mak presiza apoiu,” jornalista senior ne’e hateten ba Agência Tatoli iha edífisiu Tatoli, Faról, ohin.
Nia hatetten, hanoin sira-ne’e hotu sei tau hamutuk bainhira nia parte fila ba Austrália sei partilla ba ekipa ABC atu apoiu saida mak Tatoli presiza..
Prezidente Konsellu Diretivu TATOLI, I.P, Noémio Falcão, hateten prezensa institutu mídia ABC ID Austrália nian iha Tatoli hanesan kooperasaun ne’ebé foin hahú no sei foka liu ba iha parte redasaun inklui multimedia nian kona-ba konteúdu notísia no prosesu produsaun notísia nian.
“Sira-nia vizita iha ne’e liuhusi komunikasaun Konsellu Diretivu nian tanba TATOLI hanesan mídia estatal, ne’ebé eziste tinan-sia (9) ona no hala’o nia kna’ar hanesan mídia estatal ida to’o agora,” nia dehan.
Nia hatutan, durante ne’e informasaun ne’ebé Agência Tatoli fó sai ba kanál mídia nian, dalaruma parte ABC ID Austrália mós asesu no atrai tebes sira, tanba ne’e mak sira hili TATOLI sai parseiru ba kooperasaun servisu hamutuk.
“Tanba ne’e mak parte ABC ID delega jornalista senior Stuar Watt, mai hamutuk ho jornalista no editór sira iha Tatoli hodi observa no akompaña saida mak durante ne redasaun halo, entaun durante semana rua nia servisu iha Tatoli,” nia dehan.
Enkuantu kooperasaun ne’e sei kontinua ba oin, no planu sei asina akordu hamutuk hodi fasilita formasaun ka buat seluk, bazeia ba observasaun husi jornalista senior ne’e ninia prezensa durante semana rua iha Agência Tatoli.
Jornalista : Alexandra da Costa
Editór : Cancio Ximenes
