OEKUSI, 07 Jullu 2025 (TATOLI) – Iha semestrál primeiru ne’e, hahú fulan-Janeiru to’o Juñu 2025, Servisu Rejistrasaun no Verifikasaun Emprezariál, Institutu Públiku (SERVE,I.P) sukursál Rejiaun Administrativa Espesiál Oekusi Ambeno (RAEOA) arrekada reseita hamutuk $8,639,15 ba kofre Estadu.
Koordenadór SERVE,I.P sukurál Oekusi, Sergio Emanuel Colo, relata, reseita ne’e arrekada hahú husi Janeiru to’o Juñu, ne’ebé rekolla husi tratamentu dokumentu emprezáriu no kioske hamutuk 1.258 ho tipu Enim, Unipesoál Lda no Sa.
“Reseita ne’ebé ami rekolla, $8,639,15, entaun durante fulan neen ne’e, ami esforsa ba servisu tomak. Reseita ne’ebé rekolla, mai husi negosiante ka emprezáriu bainhira halo renovasaun dokumentu, loke rejistu foun no alterasaun, entaun liuhusi ne’e mak ita hetan reseita hodi hatama ba konfre Estadu,” nia infoma ba jornalista sira iha Oekusi, ohin.
Nia informa, kompañia 1.258 ne’e, maioria timoroan inklui estranjeiru, mak hanesan tipu Enim 889, Unipesoál Lda hamutuk 344, restante ho tipu SA.
Notísia relevante:RAEOA koordena SERVE atu altera akordu ba atividade lisensiamentu komersiál
Iha biban ne’e, Diretora kompañia Amabenu-Sila, Unipesoál Lda, Angelina de Carvalho, orgullu tanba hafoin observa atendimentu iha SERVE sukursál Oekusi hatudu mudansa.
“Ami observa atendimentu di’ak. Ita mai tuur la kle’ur simu ona dokumentu sira, tanba ita haree iha funsionáriu barak la’ós hanesan uluk ita mai hein kle’ur liu, hanesan ohin ha’u mai renova, tanba foin daudaun kaduka ona, entaun ohin ha’u renova no selu mós ba impostu, ida-ne’ebé ita tenki kumpre atu kontribui reseita uitoan ba Estadu,” nia dehan.
Notísia relevante:Janeiru-Maiu, SERVE arrekada reseita $298.976,13 ba kofre Estadu
Tuir dadus, dezde SERVE,I.P destaka iha Oekusi iha 2018 konsege rejista kompañia 219, iha 2019 rejista 119, iha 2020 rejista 99 no iha tinan-2021. Nune’e husi 2018 to’o Juñu 2021 SERVE sukursál Oekussi simu rejistu foun hamutuk 538.
Jornalista: Abílio Elo Nini
Editór: Rafael Ximenes de A. Belo
