DILI, 07 Jullu 2025 (TATOLI)—Ajénsia Notisioza Timor-Leste Tatoli, Institutu Públiku (TATOLI, I.P) no Universidade Orientál Timor Lorosa’e (UNITAL), segunda ne’e, asina akordu serbisu hamutuk iha programa sia (9).
Notísia Relevante: Tatoli no DIT asina Akordu Servisu Hamutuk iha programa ualu
Programa hirak ne’e mak hanesan Tatoli kobertura, realiza semináriu sientífiku, dies natalis, formasaun jornalizmu, dezenvolvimentu rekursu umanu, estájiu profisionál, formasaun, intérkambiu no programa ho Tatoli.
Prezidente Konsellu Diretivu Ajénsia Tatoli, Noémio Falcão, hateten objetivu husi asina akordu ida-ne’e oinsá mak Tatoli hanesan ajénsia Estadu hodi servisu hamutuk ho UNITAL liuliu ba área komunikasaun sosiál nian.
“Tanba UNITAL mós iha ninia departamentu ida kona-ba komunikasaun sosiál, entaun ida-ne’e hanesan kolaborasaun ne’ebé di’ak para fasilita no fó biban estudante sira iha formasaun kontinuasaun sira,” Prezidente Konsellu Diretivu Ajénsia Tatoli ne’e informa ba jornalista sira iha salaun UNITAL, Bekora.
Nia hatutan, akordu servisu hamutuk ne’e durante tinan-lima nia laran maibé karik iha oportunidade sei kontinua nafatin tuir prosesu tuir mai
Antes tama ba asinatura Akordu Servisu Hamutuk, Tatoli no UNITAL haree kláuzula sira hodi kesi parte sira mak hanesan iha kláuzula 1 kona-ba objetivu husi akordu mak Tatoli no UNITAL servisu hamutuk iha área oioin mak hanesan;
Tatoli no UNITAL Kobertura TATOLI-Agência Notisioza Timor Leste, hanesan mídia estatál, nessesáriu tebes halo kooperasaun ho universidade privadu atu sai hanesan parseiru iha kobertura. Kobertura hosi mídia estatal hanesan passu ida atu oinsá universidade privadu la taka aan ba Governu no Estadu hodi hare’e realidade saida mak akontese iha universidade privadu sira hanesan UNITAL no nia kontribuisaun pozitivu sira ba dezenvolve Repúblika Demokrátika Timor-Leste husi preparasaun oin-oin kona-ba sistema edukasaun ne’ebé universidade prepara ba Timor oan sira.
Kona-ba realiza semináriu sientífiku nota entendimentu ne’e loke dalan ba UNITAL no TATOLI kada tinan regularmente organiza semináriu neʼebé bele ho eskala nasionál ka internasionál, involve líder istóriku no jerasaun foun sira, akadémiku no sosiedade hotu.
Kobertura iha eventu husi nota entendimentu ne’e parte rua kolabora atu organiza eventu, inkluindu, Dies Natalis liu liu iha parte kobertura, transmisaun direta entre ambas.
Finanseira husi nota entendimentu ne’e parte rua kolabora no deside hamutuk finanseira molok hala’o programa.
Dezenvolvimentu rekursu umanu nu’udár fatór determinante ba dezenvolvimentu nasaun nian tanba ne’e parte rua hola papél importante atu ba oin servisu hamutuk hodi fasilita formasaun kontinuasaun ne’ebé bele tulun liután foinsa’e sira iha estudu formál no ikus mai kompete ho kualidade iha merkadu traballu.
Notísia Relevante: Tatoli-UNITAL organiza diskusaun kona-ba Konseitu Estadu no Vizaun Estratéjika
Estájiu profisionál parte rua kolabora atu fasilita estudante finalista sira iha UNITAL bele halo estájiu profisionák iha TATOLI.
Formasaun nota entendimentu ne’e loke dalan ba UNITAL ho TATOLI bele dezenvolve ho di’ak formasaun ne’ebé presiza liuliu formasaun jornalizmu no bele dezenvolve hamutuk jornál parede dijitál.
Intérkambiu UNITAL ho TATOLI siénsia no dezenvolve hamutuk Interkámbiu entre servisu profissional ho estudante no universidade privadu hanesan servisu ida-neʼebé mak akontese hodi fahe esperiénsia oinsá mak bele atinje kondisaun ida iha kada universidade hodi bele fó resposta ba públiku kona-ba prosessu dezenvolvimentu no profisionálizmu ba estudante hodi hateke ba dook oinsá projeta futuru hanesan ema profisionál.
Programasaun UNITAL ho TATOLI, nota entendimentu ne’e loke dalan ba UNITAL nu’udár sentru akadémiku ne’ebé bele prienxe programa sira iha TATOLI hanesan Tatoli Hakbesik, Tatoli Llarifika, Entrevista Eskluziva no programa seluk tan ne’ebé sei kria tan.
Magnífiku Reitór UNITAL, Claudino Ninas Nabais, akresenta tan akordu entre Ajénsia Tatoli ho UNITAL hanesan nota entendimentu servisu hamutuk ne’ebé baibain UNITAL halo ho parseieu seluk.
“Liuhusi akordu ne’e konsidera hanesan parseiru importante hodi servisu hamutuk iha área oioin liuliu ajuda kapasita estudante liuhusi formasaun profisionál sira,” nia dehan.
Iha biban ne’e mós loke espasu ba jornalista sira husi Tatoli hodi hala’o kobertura ba atividade UNITAL nian, entaun parte rua sei koordena malu hodi servisu di’ak liután tuir deklarasaun ne’ebé mensiona iha nota entendimentu ida-ne’e.
TATOLI-Agência Noticiosa de Timor Leste, L.P, ho karáter koletiva ho direitu públiku, kria husi Dekretu Lei, N.º 21/2017 de 24 de Maio. Reprezenta husi Prezidente Konsellu Diretivu TATOLI, Noémio Mateus Soares Falcão ho Sede Situada iha Edifísiu TATOLI nº 10 iha Travessa Sergio Viera de Mello, Suku Motael, Postu Administrativu Vera Cruz, Munisípiu Dili.
Universidade Oriental Timor Lorosa’e habadak ho UNITAL, nu’udár Instituisaun Ensinu Superior Privada Naun Lukrativu neʼebé harí iha loron 22 de Outumbro de 2002, Reprezenta husi Reitor Dr. Claudino Ninas Nabais, Ph. D. Ofisiu iha Avenida Liberdade Imprensa, Becora, Dili, Timor-Leste.
Notísia Relevante: ABC Austrália-TATOLI hala’o servisu hamutuk dezenvolve servisu jornalizmu
Jornalista : Alexandra da Costa
Editór : Cancio Ximenes
