DILI, 20 Juñu 2025 (TATOLI) – Ajénsia Notisioza Timor-Leste Tatoli, I.P no Dili Institute of Technology (DIT) asina, ohin, Akordu Serbisu Hamutuk (ASH) iha programa ualu.
Akordu sira ne’e mak hanesan – Tatoli kobertura, realiza semináriu sientífiku, dies natalis, dezenvolvimentu rekursu umanu, estájiu profisionál, formasaun, intérkambiu, no programa ho Tatoli.
Prezidente Konsellu Diretivu Tatoli, I.P, Noémio Falcão, informa objetivu husi akordu ne’e atu kolabora hodi organiza semináriu nasionál ne’ebé regulár kada tinan, nune’e mós ko’alia kona-ba servisu hamutuk sira, liuliu liga ho publikasaun notisía sira kona-ba atividade universidade nian, nomós ko’alia kona-ba programa Tatoli nian ne’ebé fó mós biban ba DIT, liuliu dosente no estudante sira bele bá Tatoli hodi ko’alia.
Aleinde akordu ualu ne’e, sei iha mós artigu balun ne’ebé daudaun ne’e parte rua sei diskute ka tetu hela mak kona-ba bolsa estudu ba jornalista. “Ida-ne’e parte rua sei kolabora oinsá DIT bele fornese bolsa estudu ba jornalista, editór no funsionariu sira iha Tatoli”, prezidente adianta.
Relasiona ho akordu ne’ebé parte rua asina ona, Noémio Falcão dehan nia implementasaun hahú husi asinatura akordu ne’e ho durasaun tempu tinan lima no posibilidade bele kontinua.
Antes tama ba asinatura Akordu Servisu Hamutuk, Tatoli no DIT haree kláuzula sira hodi kesi parte sira mak hanesan iha kláuzula 1 kona-ba objetivu husi akordu mak Tatoli no DIT servisu hamutuk iha área oioin.
Iha área Tatoli Kobertura tanba nesesáriu tebes halo kooperasaun ho universidade privada atu sai hanesan parseiru iha kobertura.
Kobertura husi média Estatál hanesan pasu ida atu oinsá universidade privada la taka an ba Governu no Estadu hodi haree realidade saida mak akontese iha universidade privada sira hanesan DIT nia kontribuisaun pozitiva sira ba dezenvolvimentu Timor-Leste husi preparasaun oioin kona-ba sistema edukativu ne’ebé universidade prepara ba timoroan sira.
Kona-ba programa realiza semináriu sientifiku nian ne’e loke dalan ba DIT no Tatoli kada tinan organiza semináriu ne’ebé bele ho eskala nasionál ka internasionál. Atividade ne’e envolve líder istóriku no jerasaun foun sira, akadémiku no sosiedade hotu.
Relasiona ho atividade dies natalis, husi ASH ne’e parte rua kolabora atu organiza eventu dies natalis liuliu iha parte kobertura, tranzmisaun direta no parte Tatoli mak sei toma konta hasai foto ofisiál ba judisium no graduasaun estudante DIT kada tinan.
Ba dezenvolvimentu rekursu rekursu umanu ne’e nu’udar fatór determinante ba dezenvolvimentu nasaun nian, tanba ne’e parte rua hola papél importante atu servisu hamutuk hodi disponibiliza formasaun kontínua ne’ebé bele tulun foinsa’e sira iha estudu formál no ikus mai kompete ho kualidade iha merkadu traballu.
Iha área estájiu profisionál katak parte rua kolabora atu fasilita estudante finalista sira iha DIT bele halo estájiu profisionál iha Tatoli.
Kona-ba formasaun iha ASH ne’e loke dalan ba DIT no Tatoli bele dezenvolve ho di’ak formasaun ne’ebé presiza, liuliu formasaun jornalizmu no bele dezenvolve hamutuk Jornál Parede Dijitál.
Kona-ba interkámbiu DIT ho Tatoli, katak sei inisia no promove hamutuk intérkambiu entre servisu profisionál ho estudante no universidade privada hanesan servisu ida neʼebé akontese hodi fahe esperiénsia oinsá mak bele atinje kondisaun ida iha kada universidade hodi bele fó resposta ba públiku kona-ba prosesu dezenvolvimentu no profisionalizmu ba estudante hodi hateke ba dook oinsá projeta futuru hanesan ema profisionál.
Ikus mak kona-ba programa ho Tatoli ne’e loke dalan ba DIT nu’udar sentru akadémiku ne’ebé bele prienxe programa sira iha Tatoli, inklui entrevista eskluziva, Tatoli Hakbesik, Tatoli Klarifika no Programa seluk ne’ebé sei hamosu tan.
Iha konteúdu akordu ne’e hateten implementasaun tuir nesesidade entre parte rua ho forma fazeadamente hodi hatán ba preokupasaun kada intituisaun.
Akordu nia meta prinsipál mak fornese kualidade ne’ebé di’ak hodi atinje realizasaun akordu hanesan parseiru resíproku entre instituisaun.
Tatoli kria husi Dekretu-lei númeru 21/2017, 24 Maiu. Tatoli nu’udar Ajénsia Notisioza Timor-Leste nian no hanesan fonte informasaun ofisiál Estadu ho produsaun notísia ba públiku iha eskala nasionál, rejionál no internasionál.
Dili Institute of Technology nu’udar Instituisaun Ensinu Superiór Privada Naun Lukrutivu ne’ebé harii iha loron 10 Maiu 2002 ho baze legál tuir Lei númeru 14/2008, Lei Baze Edukasaun, iha artigu 26 kona-ba Estabelesimentu Ensinu Superiór no Diploma Ministeriál númeru 6/2009, 25 Fevereiru, ne’ebé konsede lisensiamentu no akreditasaun inisiál Dili Institute of Technology.
Nune’e, liuhusi Akordu Servisu Hamutuk entre Tatoli no DIT ne’ebé asina husi Prezidente Tatoli, Noémio Falcão, no Reitór DIT, Salustiano Piedade, hanesan pasu importante ida ba mídia estatál atu naloke an hodi servisu hamutuk ho universidade no institutu sira.
Notísia relevante: Tatoli no DIT promove semináriu kona-ba Konseitu Estadu no Vizaun Estratéjika ba Dezenvolvimentu Nasionál
Jornalista: Arminda Fonseca
Editora: Maria Auxiliadora
