DIILI, 11 Jullu 2025 (TATOLI)-Tribunál Judisiál Primeira Instánsia Dili, sesta ne’e halo julgamentu ba arguidu na’in-lima ho inisiál MMO, ET, AM, SK no ER ba krime furtu agravadu iha loja ida área Kampung Baru inklui loja ida iha Likisá.
Arguidu sira ne’e akuza ho krime furtu agravadu tanba loja na’in lakon sasán, osan no enfrenta ameasa. Kazu ne’e akontese iha loron 25 fulan-Marsu 2024 liubá.
Sasin RMdR nu’udar servisu na’in iha loja Kampung Baru, ne’ebé aprezenta iha audénsia julgamentu haktuir nia uma iha kedas loja kotuk. Oras dadeer-nian, maizumenus tuku 04.00 ema ida ba dere sira-nia odamatan. Afinál ninia patraun ho patraun-nia aman, fó hatene ba sasin katak ema tama bá loja.
Simu informasaun ne’e, sasin ho nia laen hamutuk ho patraun sira tama bá loja haree sasán sira namkari loos. Ho situasaun ne’e, sasin haruka patraun kontaktu polísia, tanba la’ós sasán iha loja laran mak runggu-rangga maibé patraun mos ho kondisaun kanek iha rentos.
Perante audénsia, testamuña deklara katak la hatene kauza husi patraun nia ulun ran sai.
Karreta ne’ebé arguidu sira lori hodi halo asaun, sasin CY deklara ba tribunál katak karreta ne’e fó aluga ba arguidu sira ho razaun halo servisu balun iha Likisá.
Arguidu ET konfesa ba tribunál katak simu kontaktu husi SK hodi aluga karreta ida iha área Delta nian. Depois foti karreta, sira tula malu hodi hemu-tua iha área Largo Lecidere, husi lori malu ne’e ET kontaktu tan kolega na’in-rua hanesan MMO no AM, nune’e sira na’in-lima inklui ER hemu to’o dadeer.
Husi Largo Lecidere sira liu ponte foun no to’o loja ida iha Kampung Baru besik sentru saúde nian, SK orienta para karreta iha loja oin no SK lori xavingleza selok loja nia odamatan hodi husu ajuda ba MMO no AM hiit odamatan. Depois SK tama ba loja laran hamutuk ho MMO, AM no ET hodi foti sasán. Maibé arguidu ER la tama, iha de’it karreta laran.
Arguidu ET deklara, SK mak foti osan atus ida, no osan besi brankas rua. SK dehan ba nia kolega na’in-haat seluk katak osan ne’e atu enxe mina karreta.
Arguidu deklara tan hafoin foti osan no sasán iha loja laran, nia hatún arguidu sira iha ida-idak nia hela fatin, ikus mak nia entrega hikas karreta ba fatin aluga no fila uma ho taxi.
Depois loron-rua, ET haktuir simu fali kontaktu husi SK atu foti fali karreta iha fatin aluga para tula sasán. Ho kontaktu ne’e, ET kontaktu hikas nia kolega na’in-rua seluk MMO ho AM.
Durante sira-nia viajen bá Likisá, SK hatete ba sira katak bainhira sira tula duni buat ne’e, sira sei fahe osan ba malu, no ema ida sei hetan rihun-ida resin.
Antes tama Likisá, sira sei para karreta iha dalan hodi hemu tua, depois to’o Likisá sira kontinua ho karreta liu ba Likisa nia sorin para iha Mota laran ida. Depois kalan ona sira fila fali mai iha Likisá, no to’o iha Loja ida nia oin, SK haruka para arguidu mós para.
Arguidu deklara, para tiha karreta arguiduSK tún uluk hodi sobu odamatan, no hamutuk ho arguidu MMO no AT tama ba iha loja laran, arguidu hein kleur sira la sai mai arguidu mós tuir tama ba. Iha laran arguidu ET haree SK hamrik besik fatin kasir nian, no arguidu foin hase ba arguidu SK dehan nia hamrik fali iha ne’e, nune’e arguidu SK hateten ba arguidu ET katak se ó tauk ten lalika mai ida, SK kontinua ba foti tudik entrega ba arguidu MMO no AM inklui arguidu ET kaer, hodi tama ba lezadu sira-nia fatin.
Arguidu deklara, sira tama ba lezadu nia fatin, lezadu toba hela, tanba ne’e sira lori de’it kartaun identidade nia talin maka futu lezadu. SK kontinua tama ba lezadu nia oan mane nia kuartu, hodi see katana ba nia oan mane nia hirus matan, no lezadu nia oan mane dehan ba SK katak, kolega keta oho, foti osan karik foti ba.
Arguidu deklara, foti tiha brankas osan nian, tua, no sigaru, sira fila ona, mai iha dalan maka sira fera brankas hodi sura osan hamutuk rihun lima. Osan nee sira fahe kada ema ida rihun ida resin, tua sira hemu hotu, no sigaru iha SK.
Arguidu deklara, depois polísia detein sira, osan sira entrega hotu ona.
Iha sala julgamentu, arguidu MMO deklara, faktus ne’ebe iha loos hotu, maibé arguidu la hatene momentu ho intensaun sai ho karreta ne’e ba komete krime.
Arguidu deklara, momentu iha loja ida Kampung Baru, arguidu mos tama ba laran, maibé la foti sasán SK mak foti. Likisa arguidu la lori tudik, maibé SK mak fó sabit ida ba arguidu kaer, no rekoñese lori duni kartaun identidade nia talin futu lezadu.
Arguidu deklara, momentu bá Likisá ne’e SK dehan de’it tula sasán, tanba ne’e maka arguidu mós hakarak tuir. Enkuantu, osan ne’ebé fahe ba malu, entrega ona ba polísia.
Arguidu AM mos rekoñese faktu sira iha akuzasaun, maibé intensaun tuir arguidu SK la’ós atu komete krime. Ho aktu ne’e, nia deklara arrepende.
Hafoin Tribunál rona depoimentu sasin no arguidu sira, tribunál ajenda fali julgamentu ba loron 24 fulan-Jullu 2025, tuku 11:00 hodi kontinua rona loja na’in iha Kampung Baru.
Tuir akuzasaun Ministeriu Públiku nian katak, iha loron 25 fulan-Marsu tinan 2024, meia-noite arguidu sira tula malu ho karreta marka MAZDA CX7 matrikula A.12-470 TL.
Tuku 02h50 arguidu sira tama ba loja ho naran Wang Jhong iha Kampung Baru Komoro foti osan $655, pulsa TT, Telemor, Telkomcel hamutuk $300, telefone ho marka telemor ho folin $36 nia tolu, spiker boot ida folin $38, mina-morin tolu, kadeli tolu ho folin $9.00, Besi Gym rua ho folin $46, brinkus haa, kelu no kopu tolu ho folin $17, totál ba osan $127.50.
Tuir mai iha loron 28 fulan-Marsu 2024 sira bá Likisá ho karreta marka Toyota Prado matrikula 23-035. Destinasaun iha loja LEADSO nia oin, aldeia Leopa, suku Dato, SK hodi xavingleza roda nian selok no sobu odamatan loja, hafoin nakloke arguidu sira nain tolu ajuda hit sae odamatan.
Tama ba loja laran, arguidu MMO sobu CCTV no arguidu AM hafuhu ema iha liur, no arguidu SK hakat loke gaveta haree osan laiha arguidu SK obriga sira nain tolu dehan tama de’it ba sira nia kuartu hodi fanu.
Arguidu sira foti lampada tau ba ulun foti katana no sabit iha loja laran hakat ba lezadu nia kuartu hodi futu uluk nia aman lezadu Wang Yong Chao, MMO hein lezadu no arguidu ET no AM akompaña SK hakat ba lezadu XX nia kuartu, silu nia liman rua ba kotuk arguidu ET no AM kesi nia liman no ain, tuir mai SK see katana hodi husu osan rai iha ne’ebé ho lian Indonézia, lezadu hatán osan iha ne’eba, labele hamate ha’u.
Tuir mai SK hit brankas sai husi janela, arguidu nain tolu foti tan sigaru slop 26, tua legend botir hitu, hamutuk botir 10.
Sira fera brankas iha área ponte Komoro Dili hodi fahe osan $5.000 kada ema ida hetan $1.250, sasán sira seluk hanesan sigaru no tua hela ba SK.
Husi hahalok sira ne’e, totál prejuizu ne’ebé lezadu sira hetan mak $7.000. Nune’e, arguidu ET, MMO, AM, komete krime furtu agravadu no armas branka.
Arguidu sira mós envolve ona kazu tolu ho númeru prosesu Nuc 0387/2015/DICMR. mic 0369/2021/DICMR, nuc 0748/2018/DICMR.
Audensia julgamentu preside husi juiz koletivu, Arjentino Nunes, Zulmira Auxiladora, Ivan Patrocenio, Ministériu Públiku reprezenta husi Prokuradór, Domingos Barreto, arguidu sira hetan asisténsia legál husi advogadu privadu, Manuel Tilman.
Notísia relevante: Tribunál julga arguidu MM ne’ebé envolve krime arma branka
Jornalista : Natalino Costa
Editora : Rita Almeida
